Sumqayıtda 8 poliklinikada yeni növ koronavirus (COVID-19) əleyhinə vaksinasiya tədbirlərinə başlanılıb.
Xeberle.com xəbər verir ki, ilkin olaraq risk quruna daxil olan tibb işçiləri peyvənd olunur. Artıq Sumqayıtda fəaliyyət göstərən tibb müəssisələrinin baş həkimləri peyvənd olunublar.
Tibb müəssisələrinin giriş qapısında hansı otağın peyvənd üçün ayrıldığını göstərən xüsusi lövhələr var. Tibb müəssisəsində vaksinasiya üçün müraciət edən vətəndaşlar üçün hər cür şərait yaradılıb. Əvvəlcə müraciət edən vətəndaş xüsusi ayrılmış otaqda qeydiyyata alınır və bundan sonra vaksinasiya otağına aparılır. Peyvənd üçün ayrılmış otaqlar soyuducular və termoçantalarla təmin edilib. Çinin "Sinovac” şirkətinin "CoronaVAC” vaksini xüsusi ayrılmış peyvənd otaqlarında və yalnız təlim keçmiş həkimlərin nəzarəti altında vurulur. Vaksin vurulduqdan sonra yarım saat ərzində hansısa əks təsirin olub olmadığı izlənilir. İndiyədək vaksin vurulan işçilərdən heç birində narahatlıq və hansısa əks-təsir hiss edilməyib. Fevralın 1-dən isə yaşı 65-dən yuxarı olan vətəndaşların vaksinasiyası başlanılacaq. İlkin peyvənddən 14-21 gün sonra isə ikinci dozanın vurulması nəzərdə tutulub
Xədicə Səxavətqızı
Xəbərdən istifadə edərkən istinad etmək vacibdir.
