Bildiyimiz kimi, artıq 1 aprel 2021-ci il tarixindən Azərbaycan Respublikası ərazisində İcbari Tibbi Sığortanın tədbiqinə başlanılıb. Tibbi sığortanın tətbiqi ilə əlaqədar Sumqayıt şəhərinin tibb müəssisələrində də bir çox dəyişikliklər həyata keçirilib. Bu dəyişikliklərin nəticəsində prosedur qaydaları dəyişdiyindən imtiyazlı qrupa daxil olan xəstələr (Şəkərli diabet, talessemiya, onkoloji və s. xəstələr) həkim müayinəsindən keçməkdə və dövlət tərəfindən pulsuz təmin olunduqları dərmanları almaqda çətinlik çəkirdilər. Belə ki, hər ay imtiyazlı qrupa aid olan bu vətəndaşlarımız dərmanlarını almaq üçün artıq 3 ayrı ünvanda yerləşən tibb müəssisəsinə getməli idi. Buna isə xəstənin nə səhhəti yol vermirdi, nə də vaxtı, nə də imkanı olmurdu...
Mövzu ilə əlaqədar Sumqayıt şəhər Səhiyyə şöbəsinin müdiri Səkinə Sadıxova Xeberle.com-a açıqlama verərərək bildirib ki, İcbari Tibbi Sığortaya keçidlə əlaqəli olaraq aparılan islahatlar nəticəsində şəhərin tibb müəssisələrində bəzi yerdəyişmələr olmuşdu ki, bu da haqlı olaraq bu qrup əhali arasında narazılığa səbəb oldu. "Lakin iyun ayının ikinci on günlüyündən etibarən bununla bağlı dəyişiklik edildi. Belə ki, imtiyazlı qrupa daxil olan vətəndaş qeydiyyatda olduğu tibb müəssisəsində həkim müayinəsindən keçərək, möhürlü reseptini alıb, elə həmin ünvanda da dövlət tərəfindən verilən ödənişsiz dərman vasitələrini ala biləcək. Bunun üçün artıq bir neçə ünvana getməyə ehtiyac qalmayacaq və vətəndaşlarımızın rahatlığı üçün bütün xidmətlər eyni ünvanda cəmləşəcək”, - deyə S.Sadıxova bildirib.
Məsələ ilə bağlı İcbari Tibbi Sığorta Agentliyindən də açıqlama verilib. Qurumun İctimaiyyətlə əlaqələr şöbəsindən məlumat verilib ki, ölkədə icbari tibbi sığortanın tətbiqi ilə bağlı həyata keçirilən islahatlar çərçivəsində əhaliyə keyfiyyətli tibbi xidmətin göstərilməsi məqsədi ilə səhiyyə sistemində optimallaşdırılma işləri aparılmaqdadır və bununla əlaqədar olaraq, ilkin səhiyyə xidməti və ixtisaslaşdırılmış tibbi yardımın ayrı-ayrı tibb müəssisələrində göstərilməsi nəzərdə tutulub: "Bu yeniliyin əhali üçün əhəmiyyəti ondan ibarətdir ki, bütün ailə üzvləri bir məkanda - ASM-də tibbi xidmətdən yararlana biləcəklər. Əvvəllər böyüklər, uşaqlar üçün 2 ayrı poliklinika fəaliyyət göstərirdi. İndi isə valideyn özünün və övladının səhhəti ilə bağlı narahatlıq yarandığı zaman bir tibb müəssisəsinə, yəni ASM və yaxud poliklinikaya müraciət edəcək. Bu, vətəndaşların ilkin səhiyyə xidməti üzrə tibbi xidmətləri bir məkanda əldə etməklə onların rahatlığına xidmət edəcək. İxtisaslaşdırılmış tibbi yardımın ilkin səhiyyə xidmətindən ayrılaraq ambulator-poliklinik müəssisələrdə təşkil olunması poliklinikalardakı ixtisaslı həkimlərin xəstəxanalarda çalışmasına imkan verəcək. İxtisaslaşdırılmış tibbi yardım göstərən tibb müəssisələrində USM, rentgenoqrafiya, laborator müayinələr kimi diaqnostik xidmətlər vətəndaşlara təqdim olunur. Həmin tibb müəssisələri müxtəlif profilli həkimlərlə komplektləşdirilir.”
Qeyd edək ki, mart ayının 19-dan davam edən bu problem Xeberle.com-un İcbari Tibbi Sığorta Agentliyinə göndərdiyi sorğudan sonra həllini tapıb.
Xədicə Səxavətqızı
Xeberle.com
Xəbərdən istifadə edərkən istinad etmək vacibdir.
