Avqustun 9-dan etibarən peyvəndə qarşı əks göstərişi olanlara "əks
göstəriş sertifikatı” nın verilməsinə başlanılıb. Vətəndaşlar bunun üçün
xəstəliklərini təsdiq edən sənədləri qeydiyyatda olduqları ərazidəki
poliklinikalara təqdim etməlidirlər. Həmin sənədlər isə Səhiyyə
Nazirliyində yaradılmış xüsusi komissiya tərəfindən araşdırılır və
sertifikatlar verilir.
Sumqayıt
şəhər sakini, 1983-cü il təvəllüdlü Elnur Rəhman oğlu Əfəndiyev isə
prosesdən narazıdır. O, onkoloji xəstəlikdən əziyyət çəkib. 2005 və
2012-ci illərdə İranda belindən üç dəfə əməliyyat keçirib, şüa
terapeyası alıb. Elnur Əfəndiyev deyir ki, "əks göstəriş sertifikatı”
üçün Sumqayıt Şəhər Onkoloji Xəstəxanaya müraciət edib, ona peyvənd
vurulması üçün əks göstərişin olmadığını söyləyiblər.
Elnur
Əfəndiyev Meydan TV-yə danışıb ki, peyvənd könüllü olsa da, hər yerdə
sertifikat tələb edilir. Buna görə də məcburiyyət qarşısında xəstəxanaya
müraciət edib: "İranda həkimlər vitaminlər, o cümlədən immunitet üçün
dərmanlardan istifadə etməməyimi, əks halda xəstəliyin yenidən yarana
biləcəyini demişdilər. Çoxlu sayda şüa almışam və bunu təsdiq edən
sənədi də xəstəxanada baş həkimə təqdim etdim”.
Sumqayıt
Şəhər Onkoloji Xəstəxananın baş həkimi Əfəndiyevə hazırda onkoloji
xəstə olmadığını, xüsusi ehtiyatla yan tərəfdən peyvənd vurdura
biləcəyini deyib.
"Dedim
ki, söylədiklərini yazılı formada təqdim etsin. Mənə təqdim etdiyi
sənəddə də xüsusi ehtiyatla peyvənd vurdura biləcəyim yazılıb. Amma heç
kim "xüsusi ehtiyat”ın nə olduğunu anlamadı. Gülməli vəziyyət yarandı.
"Peyvəndi vurmağın bir yolu var”, tibb işçiləri də belə dedilər. Hamı
kimi mənə də vaksin vuruldu”, - şikayətçi söyləyib.
Peyvənddən
bir neçə gün sonra vəziyyəti pisləşən Elnur Əfəndiyev həkimə müraciət
edib, test verib və koronavirusa yoluxduğu bəlli olub. Dediyinə görə,
avqustun 6-dan müalicə alır, lakin hələ də vəziyyəti ağır olaraq qalır:
"Mənə
xeyli sayda vitaminlər, immuniteti yüksəldən dərmanlar yazıblar. Evdə
müalicə alıram, boğulmalarım azalmayıb. İrandakı həkimlər isə peyvəndin
mənim üçün əks göstəriş olduğunu söyləmişdilər”.
Elnur
Əfəndiyevə koronavirusa yoluxduğundan peyvəndin ikinci dozası
vurulmayacaq. Birinci dozanı alsa da, peyvənd olunmuş kimi qeydiyyata
alınmır, sertifikat verilməyəcək. Şikayətçi peyvəndlə xəstəliyinin
yenidən baş qaldıracağından narahatdır:
"Bildilər
ki, onkoloji xəstəyəm, mənə əks-göstəriş sertifikatı təqdim
edilməliydi. "Xüsusi ehtiyatlı” sözü ilə məsuliyyətdən yayınmağa
çalışırdılar”.
Səhiyyə
Nazirliyindən və TƏBİB-dən şikayətlə bağlı açıqlama verilməyib.
Sumqayıt Şəhər Onkoloji Xəstəxanadan isə bildiriblər ki, sağalmış
şəxslər vaksin edilə bilərlər. Vaksin yoluxma risqini azaldır, yoluxduğu
təqdirdə ağırlaşmanın qarşısını alır:
"Görünür,
həmin şəxs sağalıb, buna görə də ona vaksin tövsiyə edilib”. Ancaq
xəstəxanadan "xüsusi ehtiyatlı” davranışın nə demək olduğu açıqlanmayıb.
"Əks göstəriş sertifikatı” komissiyanın rəyinə əsasən, yalnız bu şəxslər həmin sertifikatı ala bilər:
Hamilə qadınlar;
Süd verən analar;
COVID 19-a qarşı peyvəndə allergiyası və ümumiyyətlə allergiya xəstəliyindən əziyyət çəkən şəxslər.
Komissiya
mütəxəssislərinin rəyinə görə, şəkərli diabet və onkoloji xəstəlikdən
əziyyət çəkən şəxslər müalicə bitdikdən sonra vaksinasiya oluna
bilərlər.
Xəbərdən istifadə edərkən istinad etmək vacibdir.
