"2021-ci il 15 iyun tarixində Azərbaycan Respublikasının Prezidenti İlham Əliyev və Türkiyə Respublikasının Prezidenti Rəcəb Tayyib Ərdoğan arasında Şuşada imzalanmış "Azərbaycan Respublikası ilə Türkiyə Respublikası arasında müttəfiqlik münasibətləri haqqında Şuşa Bəyannaməsi" iki qardaş ölkə arasındakı strateji tərəfdaşlığın yeni mərhələsini rəmzi olaraq ifadə edir. Bu tarixi sənəd iki dövlət arasında mövcud olan qardaşlıq əlaqələrini daha da möhkəmləndirdi.
"Şuşa Bəyannaməsi" Azərbaycan və Türkiyə arasındakı tarixi qardaşlığı bütün dünyaya bəyan edən güclü bir mesajdır. Bu sənədin imzalanması ilə hər iki ölkə qarşılıqlı əlaqələrini müttəfiqlik səviyyəsinə qaldıraraq regional təhlükəsizlik və sabitliyin təmin olunmasında mühüm rol oynayacaqlarını göstərdi. Bəyannamə Azərbaycan və Türkiyə arasında siyasi, iqtisadi, hərbi və mədəni əlaqələrin daha da inkişaf etdirilməsinə yol açaraq, qlobal miqyasda nüfuzlarını artırmağa xidmət edir."
Xeberle.com məlumat verir ki, bu sözləri açıqlamasında Milli Məclisin deputatı Müşfiq Məmmədli deyib. Deputat bildirib ki, "Şuşa Bəyannaməsi"nin iki ölkə arasındakı əməkdaşlığın bütün sahələrdə genişlənməsini təmin edir: Sənəd, siyasət, beynəlxalq əməkdaşlıq, enerji təhlükəsizliyi, iqtisadiyyat, nəqliyyat, mədəniyyət, təhsil və ordu quruculuğu kimi strateji sahələri əhatə edir. Bu sahələrdəki əməkdaşlıq regionda dayanıqlı inkişafı təmin etməklə yanaşı, ölkələrimiz arasındakı əlaqələrin davamlı və daha yüksək səviyyəyə çatdırılmasına xidmət edir."
M. Məmmədli qeyd edib ki, "Şuşa Bəyannaməsi" Azərbaycan və Türkiyə arasında iqtisadi əlaqələrin daha da genişləndirilməsinə imkan yaradır. Bu sənəd regionda yeni sərmayə qoyuluşlarını stimullaşdırmaqla, iqtisadiyyatın inkişafını və yeni iş yerlərinin yaranmasını təşviq edir: "Xüsusilə Şuşa və onun ətraf bölgələrinin turizm potensialı genişləndiriləcək, bu da iqtisadi inkişaf üçün yeni perspektivlər açacaqdır. Qarşılıqlı investisiyaların artırılması, hər iki ölkənin iqtisadi qüdrətinin daha da güclənməsinə və beynəlxalq arenada mövqelərinin möhkəmlənməsinə gətirib çıxaracaq."
Xəbərdən istifadə edərkən istinad etmək vacibdir.
