Azərbaycanda keçiriləcək növbədənkənar parlament seçkilərinə sayılı günlər qalıb və təbii olaraq seçkilər hazırda ölkənin əsas gündəm mövzusudur.Mandat əldə etmək üçün seçkilərdə iştirak edəcək namizədlər arasında siyasi partiyaların xeyli sayda üzvü var.Bəzi partiya liderləri seçkidə iştirak etməsələr də, təşkilatın digər üzvləri namizəd kimi irəli sürülüb. Bu il keçiriləcək parlament seçkiləri xüsusi əhəmiyyəti ilə seçilir. Səsvermə müstəqillik tariximizdə ilk dəfə olaraq ərazi bütövlüyü və suverenliyi tam təmin olunmuş Azərbaycanda baş tutacaq. Parlamentdə kimlərin yenidən mandat alacağı, 70 yaşı ötmüş millət vəkillərinin yenidən seçilmək, Milli Məclisdə təmsil olunmaq şansları ilə bağlı açıq suallar var.
Növbədənkənar parlament seçkilərinin keçirilməsi ilə bağlı ölkə gündəminin əsas mövzusu deputatlığa namizədlər, onların seçki şüarları, platformaları və vədləridir. Lakin, bəzi hallarda deputatlığa namizədlərin çox irreal, deputatın səlahiyyətindən kənar vədlər verdiyinin də şahidi oluruq. Deputatlığa namizədlər az qala "hər seçici ilə görüş” taktikasına üstünlük verirlər.Onu da qeyd edək ki, əvvəlki parlament seçkilərindən fərqli olaraq,Sumqayıt və Abşerondan deputat sayında artım olacaq.
"Gənclik şəhəri”nin deputatları yenidən namizəd oldu
Artıq Yeni Azərbaycan Partiyasının (YAP) deputatlığa namizədlər siyahısı elan edildi. Milli Məclisə keçirilən seçkilərdən sonra əksər dairələrdə deputatlar dəyişməz qalsa da, Sumqayıt barədə bunu demək olmaz. Hər yeni seçki Sumqayıta yeni adlar bəxş edir.
Ötən seçkilərdə YAP tərəfindən 41 saylı Sumqayıt birinci seçki dairəsindən namizədliyi irəli sürülən Hüseynova Hicran Kamran qızı 32.6 % səslə qalib gəlmişdi. Bu seçkilərdə isə Hicran Hüseynova YAP tərəfindən 42 saylı dairədən namizədliyi irəli sürülüb. Əvvəlki seçkilərdə 42 saylı Sumqayıt ikinci seçki dairəsindən 50.1 % səslə qalib gələnTahir Mirkişili isə bu dəfəki seçkilərdə 43 saylı seçki dairəsindən namizədliyini irəli sürüb.
YAP Sumqayıtdan görün kimi namizəd irəli sürdü
Təsadüfi deyil ki, növbədənkənar parlament seçkilərinin bu dəfəki mərhələsində Sumqayıt üzrə yeni simalara da rast gəldik. Sumqayıt seçi dairələrində namizədliyini verənlər arasında Bakı Şəhəri üzrə Təhsil İdarəsinin keçmiş müdiri Mehriban Vəliyeva da var. O hakim Yeni Azərbaycan Partiyasından (YAP) deputatlığa namizəd olub. Görəsən, 44 saylı Sumqayıt üçüncü seçki dairəsindən namizədliyi irəli sürülən Mehriban Vəliyevanın seçilmə şansı nə qədərdir? Xatırladaq ki, ötən seçkilərdə həmin seçki dairəsindən 45.8 % səslə Müfiq Məmmədli seçilmişdi.
Nədənsə, ötən seçkilərdə 43 saylı Sumqayıt üçüncü seçki dairəsindən deputat seçilən Emin Hacıyevin bu seçkilərdə YAP tərəfindən namizədliyi irəli sürülmədi. O, Milli Məclisin Aqrar siyasət komitəsinin, Regional məsələlər komitəsinin, Hesablayıcı komissiyasının üzvüdür.
45 saylı Sumqayıt dördüncü seçki dairəsindən Hacıyev Naib İsmixan oğlu, 46 saylı Sumqayıt beşinci seçki dairəsindən Akimova Elnarə Seydulla qızı və 47 saylı Sumqayıt - Abşeron – Qaradağ seçki dairəsindən Mustafayev Musa Musa oğlu da Sumqayıt dairələrindən YAP-ın deputatlığa namizədləri arasındadır. 46 saylı Sumqayıt beşinci seçki dairəsindən namizədliyi irəli sürülən Hacıyev Naib İsmixan oğlu SDU-nun İqtisadi məsələlər üzrə prorektoru vəzifəsində çalışıb.
Sumqayıt dairələrini seçən partiya nümayəndələri
Sumqayıtın dairələrindən namizədliyini verənlər arasında müxalif camiyəsindən olan partiya nümayəndələri də olub. Klassik Xalq Cəbhəsi Partiyasının(KXCP) lideriMirhahmud Mirəlioğluisə 43 saylı Sumqayıt İkinci seçki dairəsindən namizədliyimi irəli sürüb.
Ağ Partiyanın sədri Tural Abbaslı və onun həyat yoldaşı, Ağ Partiyanın sədr müavini Nərmin Abbaslı parlament seçkilərinə qatılanlar arasındadır. Tural Abbaslının xanımı Nərmin Abbaslı 43 saylı Sumqayıt seçki dairəsindən namizədliyini irəli sürüb. Onun rəqibləri Klassik Xalq Cəbhəsi Partiyasının(KXCP) lideriMirhahmud Mirəlioğluvə hazırki deputat Tahir Mirkişili olacaq.
Tural Abbaslının qayınatası, Nərmin Abbaslının atası İkram İsrafil də deputat olmaq istəyir. Belə ki, o, 45 saylı Sumqayıt dördüncü seçki dairəsindən namizədliyini irəli sürüb. O SDU-nun İqtisadi məsələlər üzrə prorektoru Hacıyev Naib İsmixan oğlu ilə rəqib olacaq.
Sumqayıtın ədəbiyyatçı namizədləri onlardır
Sumqayıt dairələrindən namizədliyini verənlər arasında ədəbiyyat nümayəndələri də var.46 saylı Sumqayıt beşinci seçki dairəsindən namizədliyi irəli sürülən Elnarə Akimova ədəbiyyatşünas və tənqidçidir. O, Sumqayıt şəhərində anadan olub. Hazırda filologiya elmləri doktoru, dosent, AMEA Nizami Gəncəvi adına Ədəbiyyat İnstitutunun "Uşaq ədəbiyyatı" şöbəsinin və "Ədəbiyyat qəzeti"ndə ədəbiyyatşünaslıq şöbəsinin müdiridir.Elnarə Akimova Yeni Azərbaycan Partiyasının VII qurultayında (5 mart 2021-ci il) YAP İdarə Heyətinin üzvü seçilmişdir.
Vətəndaş Həmrəyliyi Partiyasının siyahısı üzrə 42 saylı Sumqayıt birinci seçki dairəsindən namizədliyini irəli sürən yazıçı-publisist Əyyub Qiyasın namizədliyi artıq DSK tərəfindən təsdiq edilib. Onun rəqibləri arasında hazırki deputat Hicran Hüseynova var.
Xatırladaq ki, müstəqil Azərbacanın ilk parlament seçkilərində Sumqayıtı Milli Məclisdə Kimya zavodunun direktoru Fikrət Sadıqov, Ana Vətən Partiyasının sədri Fəzail Ağamalı, Azərbaycan SSR Ali Sovetinin keçmiş deputatı Mətləb Mütəllimov və Əli Həsənov təmsil edib.
Sonda deyə bilərik ki, seçkilərdə Sumqayıtı seçən namizədlərdən kimin şansının çox olacağını nəticələr göstərəcək.
Elşən Yəhyayev
