İlk Avropa Oyunlarının məşəlini BakınınOlimpiya stadionuna ikiqat paralimpiya çempionu, 2 dəfə dünya, 5 dəfə Avropa çempionu, əməkdar idman ustası, "Şöhrət" ordenli, "Tərəqqi" medallı, "Heydər Əliyev" Fondunun təsis etdiyi Beynəlxalq "Qızıl çinar" mükafatları laureatı İlham Zəkiyevin gətirməsi əslində bizim üçün nə qədər gözlənilən idisə, avropalılar üçün bu addım yalnız sual doğururdu. Niyə məhz gözdən əlil bir idmançı, paralimpiyaçı?

"Qarabağ”, İlham Zəkiyev...

Əslində, bu missiyanı İlham Zəkiyevə həvalə edənlərə nə qədər təşəkkür etsək, azdır. Bu, yalnız bir paralimiyaçıya edilən jest deyildi. Bu, həm də Azərbaycanın uzun illərdir üzləşdiyi Ermənistanın təcavüzkar siyasətinin nümayişi baxımından mükəmməl şəkildə düşünülmüş addım oldu. Olimpiya stadionuna toplaşan əcnəbi idmançılar da, tamaşaçılar da, ən əsası jurnalistlər də İlham Zəkiyev haqqında maraqlanıb, məlumat topladılar. Mən Zəkiyevi stadionda əlində məşəllə görəndə dərhal yadıma "Qarabağ” futbol klubu düşdü. Dəfələrlə hər birimiz şahidi olmuşuq ki, Avropanın yaşıl meydanlarında mübarizə apararkən, əcnəbi idman şərhçiləri vurğulayıblar ki, "Qarabağ” futbol klubu Azərbaycanın Ağdam şəhərini təmsil edir və həmin şəhər hazırda Ermənistan silahlı qüvvələrinin işğalı altındadır. İlham Zəkiyev barədə maraqlanan avropalılara da, informasiya bu cür verildi: "O, Azərbaycanın ərazi bütövlüyü uğrunda döyüşlərdə, erməni hərbiçilərinin açdığı atəş nəticəsində görmə qabiliyyətini itirib. Ermənistan Azərbaycan torpaqlarının 20 faizini işğal edib”

Təşəbbüskara təşəkkür...

Möhtəşəm açılış mərasimindən sonra uzun illər dostluq etdiyim İlham Zəkiyevlə danışdım, sevinc, qürur hisslərimi bölüşdüm. İlham Zəkiyev bildirdi ki, məşəli Olimpiya stadionuna məhz onun gətirməsi Avropa oyunları təşkilat komitəsinin sədri Mehriban xanım Əliyevanın təşəbbüsü idi. Bunun üçün mən və xalqımız ona minnətdar olmalıyıq. İlham əminliyini də bilidirdi ki, ilk Avropa oyunları tək möhtəşəm açılış mərasimi, yüksək səviyyədə təşkilatçılıq, hazırlıq işləri ilə deyil, həm də Azərbaycan idmançılarının əzmkar mübarizəsi, qələbələri ilə yadda qalacaq.

Xatırlatma

İlham Zəkiyev hərbi xidmətini Beyləqan rayonunda kəşfiyyatçı kimi keçsə də, Füzuli rayonunda gedən döyüşlər zamanı yaralanıb. 1999-cu ilin fevral ayının 9-da gedən döyüş zamanı isə düşmənin atdığı snayper gülləsi sol gicgahından daxil olaraq sağ gicgahından çıxıb. Bu hadisədən sonra 5 gün komada qalıb. Artıq həm həkimlər, həm də yaxınları onun yaşayacağından ümidlərini kəsmişdilər. Bununla belə, 5 gün sonra o, komadan anasnın səsinə oyanır. Amma gözlərini açanda hər yer qaranlıq idi... Beləcə, İlham Zəkiyev görmə qabiliyyətini itirir və evə birinci qrup Qarabağ əlili kimi qayıdır.

Elnur Niftəliyev
Xeberle.com