İyunun 16-da Avropa İnsan Haqları Məhkəməsi Böyük Palatasının azərbaycanlı məcburi köçkünlərin "Çıraqov və digərləri Ermənistana qarşı” adlı şikayəti üzrə müsbət qərar çıxardığı barədə məlumat verilib.
Digər rayonlardan olan məcburi köçkünlərin pozulmuş hüquqları, onlara dəymiş ziyanla bağlı hansı addımlar atılır?
Şuşa-Füzuli-Xocalı-Xocavənd seçki dairəsindən deputat Elman Məmmədov və Xankəndi seçki dairəsindən deputat Flora Qasımovanın fikirlərini öyrəndik.
Elman Məmmədov bildirib ki, Avropa Məhkəməsinə azərbaycanlı məcburi köçkünlər tərəfindən çoxsaylı müraciət daxil olub: "Təəssüf ki, onlara daxil olan müraciətləri icraata götürmənin özünəməxsus, uzun mexanizmləri var. Laçın rayonundan çıxarılan 6 azərbaycanlının müraciəti əsasında qərar qəbul edilməsi çox böyük uğurdur. Təbii ki, Xocalı, Şuşa, Xocavənd və başqa rayonlardan olan məcburi köçkünlərin öz haqlarının təmin olunması ilə bağlı həm kollektiv, həm də fərdi müraciətlər olub.
Avropa İnsan Haqları Məhkəməsi əvvəlcə "Çıraqov və digərləri Ermənistana qarşı” adlı şikayəti icraata götürüb. Avropa təşkilatları içərisində yeganə qurum oldu ki, ədalətli qərar çıxardı. Bu, sevindirici haldır. Onların hüquqlarının pozulması da təsdiq olundu və Ermənistan günahlandırıldı. Təbii ki, bu istiqamətdə çox iş aparmalıyıq. Yorulmadan haqqımızı tələb etməliyik. Haqq-ədalət nə vaxtsa öz yerini tapacaq”.
Deputatın fikrincə, Avropa Parlamentinə, eləcə də Amerikadakı digər beynəlxalq qurumlara bunu nümunə göstərmək lazımdır: "Bu gün AŞPA-da Azərbaycanda insan haqlarının, söz azadlığının pozulması ilə bağlı yenə dinləmələr keçirmək məsələsi gündəmdədir. Avropa ilk əvvəl güzgüdə öz əməllərinə, insan və miqrant, müsəlmanlara qarşı olan təzyiqlərlə bağlı bugünkü durumuna baxsın. Sonra Azərbaycana görə dinləmələr keçirsin. Bu gün Azərbaycan dünyanın ən tolerant dövlətlərindən biridir, bəlkə də birincisidir. Azərbaycanda mədəniyyətlərarası, dinlərarası münasibətlər, tolerantlıq, söz azadlığı hər şey təmin olunub. Bu gün Amerikada irqçilik yenidən meydana çıxıb. Amerika polisinin il ərzində güllələyib öldürdüyü yüzlərlə insanlar buna sübutdur”.
Flora Qasımova bildirib ki, indiyə qədər Xankədidən olan məcburi köçkünlərə dəymiş ziyanla bağlı dəqiq məlumat yoxdur: "Hələ araşdırmalar gedir. Bu vaxta qədər özümüz araşdırmışıqmı ki, Xankədidən gələn məcburi köçkünlərə nə qədər ziyan dəyib?! Vaxtı ilə hər rayonun hüquq-mühafizə orqanları dəymiş ziyanı müəyyənləşdirmək üçün insanları çağırıb sorğular aparırdılar. Sorğu nəticəsində müəyyən olunurdu ki, əhaliyə nə qədər ziyan dəyib.
Amma Xankəndinin icra strukturu olmadığı üçün, oradan gələn köçkünlərə dəyən ziyan haqqında dəqiq məlumat yoxdur. Ümumiyyətlə, geniş şəkildə bu məsələ ilə məşğul olan olmayıb. Vaxtı ilə aparılan sorğular nəticə etibarı ilə yarımçıq qalıb.
Mən Laçın rayonundan məcburi köçkün olan 6 azərbaycanlıya minnətdaram. Onlar 10 ildir vaxtlarını bu məhkəməyə sərf ediblər. Onlara halal olsun! Bu bir daha Ermənistanın Azərbaycan torpağını işğal etməsini təsdiq edən bir faktdır”. (modern.az)
Xəbərdən istifadə edərkən istinad etmək vacibdir.
