"Mən uşaqlarımın ulu babalarının məzarında olmuşam!”.

Rusiyanın Sosial Ədalət Kommunist Partiyasının lideri, Rusiya mason lojasının rəhbəri, lojanın böyük magistrı Andrey Boqdanov Azərbaycanın işğal edilmiş ərazisi Dağlıq Qarabağa səfər edib.

O, bu barədə Facebook sosial şəbəkəsindəki səhifəsində yazıb.

İstifadəçilərin onun bu səfərinin qanunsuz olduğunu və buna görə Azərbaycan XİN-in "qara siyahısı”na düşə biləcəyi barədə sualına cavab verən Andrey Boqdanov qətiyyətlə bildirib:

"Mən uşaqlarımın ulu babalarının məzarında olmuşam! Düşünmürəm ki, bundan incimək lazımdır. Mən ki siyasətçilər və rəsmi şəxslərlə görüşməmişəm”.

Siyasətçi öz səhifəsində Azərbaycanın işğal edilmiş ərazilərində çəkilmiş şəklini paylaşıb.

Qeyd etmək lazımdır ki, A.Boqdanov dəfələrlə Bakıda olub. Sonuncu dəfə o, Azərbaycanın paytaxtına iyunda mason lojasının yığıncağında iştirak etmək üçün gəlmişdi.  (oxu.az)