Sülhəddin Əkbər: "PKK-nın Ermənistanın nəzarəti altında olan işğal olunmuş ərazilərə buraxılıb-buraxılmaması Rusiya hərbi kəşfiyyatının verəcəyi qərara bağlıdır”
Türkiyə hökuməti terrorla mübarizə çərçivəsində tarixi bir yenilik etmək qərarına gəlib. Bundan sonra terrorla mübarizə çərçivəsində axtarışda olan şəxslərin həbs olunması üçün dövlətə kömək edən şəxsləri pul mükafatı gözləyir. "Sabah” qəzetinin yaydığı xəbərə görə, Qəndildəki PKK və KCK təşkilat liderlərindən birinin ələ keçməsinə kömək edənləri 4 milyon lirəyə qədər mükafat gözləyir.
Təşkilatın aşağı səviyyəli idarəçilərinin həbs olunmasına köməklik edənlər isə 200 min lirəyə qədər mükafat alacaqlar.
Hökumətin axtarış siyahısındakı bəzi KCK və PKK liderlərinin adları belədir:
KCK (Kürdüstan İcmalar Birliyi) İcra Şurasının həmsədri Cəmil Bayık, KCK İcra Şurasının həmsədri Bese Hozat, KCK İcra Şurasının üzvü Murat Karayılan, KCK İcra Şurasının üzvü Duran Kalkan, KCK İcra Şurasının üzvü Əli Heydər Kaytan, KCK İcra Şurasının üzvü Fəhman Hüseyn, KCK İcra Şurasının üzvü Mustafa Karasu, PKK-nın Avropa cavabdehi Səbri Ok, Kongra Gel (Xalq Konqresi) həmsədri Rəmzi Qartal, PKK liderlərindən Nurəddin Dəmirtaş, PKK liderlərindən Bahoz Ərda.
Bəzi ekspertlər hesab edir ki, bu şəxslərin və digər PKK qruplarının başına pul qoymasından sonra yerlərini dəyişməsi, Türkiyənin əli çatmayan bölgələrə yerləşməsi ehtimalı daha da artıb. Bu fikirdə olanlar onların Azərbaycanın işğal altındakı Qarabağ bölgəsinə adlamaq və ora sığına biləcəyini mümkün sayırlar.
Məsələn, politoloq Arzu Nağıyevə görə, Qarabağ ərazisində muzdluların vuruşması yeni məsələ deyil:"PKK-nın da, ermənilərin də eyni mərkəzdən idarə edildiyini nəzərə alsaq, belə faktlar qaçılmazdır. Yəni Türkiyədə vuruşan, terror və təxribatla məşğul olan PKK-çılar asanlıqla Qarabağ ərazisində də ola bilərlər. Lakin onların yalnız kürdlərdən ibarət olmasını düşünmək də düzgün olmazdı. Bu yaxınlarda Türkiyə ordusunun keçirdiyi əməliyyatlar vaxtı ələ keçirilən PKK döyüşçüsü milliyyətcə erməni idi”.
Milli təhlükəsizlik nazirinin sabiq birinci müavini Sülhəddin Əkbər isə hesab edir ki, PKK-çıların Şimali İraqda və İran ərazilərində yerləşməsi üçün imkanlar var. Bu ərazilərdə gizlənə bilərlər: "Abdulla Öcalanın tutulmamışdan əvvəl hərəkət marşrutuna fikir versəniz görərsiniz ki, necə geniş bir coğrafiyada onlar hərəkət edə bilərlər. Nəzəri cəhətdən Qarabağ ərazisinə də keçə bilərlər. Ancaq buna hələlik onların ehtiyac duyacağını düşünmürəm. Çünki hələ PKK-nın sərbəst fəaliyyət alanı o qədər daraldılmayıb ki, onlar işğal edilmiş Qarabağda yerləşmələri üçün Ermənistana ehtiyac hiss etsinlər”.
S.Əkbər onu da dedi ki, hətta PKK-nın belə bir addıma ehtiyacının yaranacağı halda, razılıq Rusiyadan daha çox asılıdır: "Çünki hərbi-strateji, təhlükəsizlik baxımından Ermənistan Rusiyanın nəzarətindədir. Ermənistanın sərhədləri də, hava məkanı da Rusiya tərəfindən qorunur. Ona görə də PKK-nın Ermənistanın nəzarəti altında olan işğal olunmuş ərazilərə buraxılıb-buraxılmaması Rusiya hərbi kəşfiyyatının verəcəyi qərara bağlıdır”.
musavat.com
Xəbərdən istifadə edərkən istinad etmək vacibdir.
