"2010-cu ilin Parlament seçkilərində 125 saylı Zəngilan-Qubadlı seçki dairəsindən namizədliyimi irəli sürmüşdüm. "Seçkilər" İnformasiya mərkəzinin rəsmi məlumatına əsasən 2010-cu ildə 125-ci dairədə 47176 nəfər seçici qeydiyyatda olub, onlardan 21938 nəfəri (46.50%) səsvermədə iştirak edib. Dairə üzrə qeydə alınmış namizədlərin sayı 8 nəfər olub. Qalib namizəd 12764 səs alıb, sonuncu yeri tutan namizədin isə, 131 səsi olub. Qalib namizədlə ikinci yeri tutan namizəd arasında səs fərqi 10553 olub. Rəsmi rəqəmlərə görə, mən bu seçki marafonunda 1708 səslə 4-cü olmuşam (əlimizdə olan protokollara əsasən 2700 səs yığmışdım). Dairə 51 seçki məntəqəsindən ibarətdir, Məntəqələr Bakı, Sumqayıt, Abşeron, Gəncə, Saatlı, Şirvan və digər rayonlarda yerləşir.”

Bu fikirləri Azərbaycan Vəkillər Kollegiyasının üzvü, vəkil Anar Qasımlı Facebook səhifəsində qeyd edib. A. Qasımlı bu dəfə parlament seçkilərinə 42 saylı Sumqayıt II seçki dairəsindən qatılacağını qeyd edərək  bu addımını bir sıra amillərlə əlaqələndirib. Bu seçki dairəsini təhlil edən vəkil vurğulayıb ki, 42 saylı Sumqayıt seçki dairəsindən namizədliyinin irəli sürməsini daha məqbul hesab edir:

"42 saylı Sumqayıt ikinci seçki dairəsində 2010-cu ildə 43139 nəfər seçici qeydə alınıb, onlardan 20412 nəfəri (47.31%) səsvermədə iştirak edib. 2010-cu ildə bu dairə üzrə seçki marafonuna 11 namizəd qoşulub, qalib namizəd 8676 səs alıb, sonuncu yeri tutan namizədin isə, 197 səsi olub. Qalib namizədlə ikinci yeri tutan namizəd arasında səs fərqi 3597 olub. Dairə 38 seçki məntəqəsindən ibarətdir. 2010-cu ilin Parlament seçkilərinin nəticələrinin 42 və 125-ci dairələr üzrə müqayisəli təhlilindən bu nəticəyə gəlmək olur ki, 125-ci dairədə rəqəmlər daha çox şişirdilib və saxtakarlıq daha total olub. Yəni 125-ci dairəyə baxanda 42-ci dairə toya-bayrama getməlidir. Həm də ərazi, kontingent, vaxt baxımından da 42-ci dairədə işləmək daha əlverişlidir. 125-də seçki təbliğatı aparmaq üçün bir neçə rayon və şəhər gəzməli olduğun halda 42-ci dairədə Sumqayıtın bir neçə məhəllə və mikrorayonu ilə məhdudlaşırsan. Bu vaxtla yanaşı digər resurslara da qənaət deməkdir. Özümün Sumqayıt şəhərində yaşamağım, dostlarımın və əhatəmin burada daha geniş olması da əsas üstünlüklərdəndir. Bu və digər diqqətəlayiq halların müqayisəli təhlilindən sonra 2015-ci ilin Parlament seçkilərində 42 saylı Sumqayıt ikinci seçki dairəsindən namizəd olmaq niyyətindəyəm. Necə deyərlər, "ayağımı yorğanıma görə uzatmaq", 2010-cu ildəki kimi kortəbii, emosional deyil, "yüz ölçüb, bir biçib", imkanları və şəraiti dəyərləndirib müstəqil surətdə seçkiyə getmək planım var.”

Bütün bunlara rəğmən A. Qasımlı seçkiyə qatılmasında tərəddüdlərin də az olmadığını sözlərinə əlavə edib.

Xeberle.com