Yeni Azərbaycan Partiyası Şəmkir rayon təşkilatında cari ilin noyabr ayında Milli Məclisə keçiriləcək seçkilərlə əlaqədar bir qrup fəal gənclə görüş keçirilib. Tədbirdə YAP Şəmkir rayon təşkilatının sədri Fəxrəddin Vəliyev, YAP Şəmkir rayon təşkilatı Aparatının rəhbəri Şövqi Həsənov, YAP Şəmkir rayon Gənclər Birliyinin sədri, eyni zamanda Gənclər və İdman İdarəsinin rəisi Emin İsmayılov və fəal gənclər iştirak ediblər. Rayon təşkilatından Xeberle.com-a verilən məlumata görə, tədbiri giriş sözü ilə YAP Şəmkir rayon təşkilatının sədri Fəxrəddin Vəliyev açaraq, qarşıdan gələn parlament seçkiləri haqqında danışdı, seçkilərin ölkəmizin ictimai-siyasi həyatında mühüm bir hadisə olduğunu qeyd etdi. O, eyni zamanda, qarşıdan gələn parlament seçkilərində YAP tərəfindən namizədliyi irəli sürüləcək şəxslərin təbliğat-təşviqat kampaniyasının uğurla həyata keçirilməsində gənclərin yaxından iştirak edəcəklərinə, həmçinin, gənclərin məhz YAP tərəfindən irəli sürülmüş namizədləri dəstəkləyəcəklərinə əminliyini vurğuladı.
F.Vəliyev, bununla yanaşı, gənclərin, xüsusilə 18 yaşına çatmış ilk dəfə səs verəcək gəncləri seçkidə iştiraka səsləyəcək sosial layihələrin həyata keçirilməsində də təşkilatın fəal gənclərini aktiv iştirak etməyə səslədi.
YAP Şəmkir rayon təşkilatı Aparatının rəhbəri Şövqi Həsənov çıxış edərək Yeni Azərbaycan Partiyasının Sədri, Prezident cənab İlham Əliyev tərəfindən gənclərə göstərilən diqqət və qayğının nəticələrindən, dövlət gənclər siyasətindən geniş bəhs etdi. Həmçinin, Şövqi Həsənov, ölkədə keçirilən hər bir seçkidə olduğu kimi, parlament seçkilərində də YAP namizədlərinin qələbə qazanacaqlarına və bu prosesdə hər bir gəncin aktiv iştirak edəcəyinə əminliyini qeyd etdiyini bildirdi.
Daha sonra YAP Şəmkir rayon təşkilatı Gənclər Birliyinin sədri eyni zamanda Gənclər və İdman idarəsinin rəisi Emin İsmayılov çıxış edərək, bütün seçkilərdə namizədlər sırasında ölkənin və partiyanın ictimai-siyasi həyatında fəallıq göstərən gənclərin yer almalarının Prezident İlham Əliyev tərəfindən gənclərə göstərilən diqqət və qayğının nəticəsi olduğunu qeyd etdi. O, həmçinin, Yeni Azərbaycan Partiyasının sıralarında birləşən gənclər ordusunun bu seçkilərdə də yüksək fəallıq göstərərək etimadı doğruldacaqlarını, YAP-ın namizədlərinin qələbə qazanacaqlarından əmin olduğunu dedi.
YAP Şəmkir rayon təşkilatının fəal gənclərindən olan Tural Əliyev, Vüsal Rzayev və İlkin Musayev də çıxış edərək bildirdilər ki, Azərbaycanın və regionun ən güclü siyasi partiyası olan YAP yarandığı gündən iştirak etdiyi bütün seçkilərdə qələbə qazanıb. "YAP Prezident İlham Əliyevin rəhbərliyi ilə dövlətimizin inkişafı və xalqımızın əmin-amanlıq içində yaşaması üçün mühüm töhfələr verməkdədir. Bütün bunlar da xalqımızın və gənclərin partiyamızı bu seçkilərdə də dəstəkləyəcəyinə təminat verir. Biz gənclər də hər zaman olduğu kimi, təbliğat-təşviqat kampaniyası çərçivəsində əlimizdən gələni əsirgəməyəcəyik. Bu eyni zamanda, biz gənclər üçün böyük təcrübə rolunu da oynayacaq”, - deyə gənclər vurğuladılar.
Sonda rayon təşkilatının sədri F.Vəliyev Milli Məclisə keçiriləcək seçkilərdə Şəmkir rayon sakinləri ilə yanaşı, gənclərin də YAP-ın irəli sürəcəyi namizədlərə səs verəcəyinə, eyni zamanda, partiyamızın namizədlərinin dövlətimizin tərəqqisi, xalqımızın rifahı naminə öz üzərlərinə düşən vəzifələrin öhdəsindən gələcəklərinə şübhə etmədiyini bildirdi.