42 saylı Sumqayıt 2-ci seçki dairəsindən deputatlığa namizədliyini irəli sürmüş "Sumqayıt Gənclərinin Hüquqi Maarifləndirilməsi” İctimai Birliyinin prezidenti, hüquq müdafiəçisi Elçin Məmməd namizədliyini geri götürüb. Bu barədə Xeberle.com-a Elçin Məmmədin özü məlumat verib. Onun sözlərinə görə ölkədə hələ də seçkilərin demokratik mühitinin yaradılmasında ciddi problemlər mövcuddur və namizədlərə bərabər imkanlar yaradılmır. "Beynəlxalq təşkilatların çağırışlarına baxmayaraq, seçki prosesi hakim partiya ilə әsas müxalif qüvvələr və vətəndaş cəmiyyəti arasında dialoqun yoxluğu ilə səciyyәlənәn siyasi mühitdə cәrәyan edir. Müstəqil vətəndaş cəmiyyəti təşkilatlarının fəaliyyəti iflic edilib və onların gələcək fəaliyyət imkanları qeyri-müəyyən vəziyyətə salınıb. Hüquq müdafiəçilərinin həbsi, məhkəmə prosesləri, maliyyə sanksiyaları, bank hesablarına həbs qoyulmalar, müəyyən bəhanələrlə uzun-uzadı istintaqlara cəlb edilmələr, həmçinin jurnalistlər üzərində digər təzyiq formaları demokratik seçki prosesinə xas olan ideyaların sərbəst ifadə edilməsi üçün əlverişli olmayan mühit yaradır. Bundan əlavə, ATƏT-in noyabrda keçiriləcək seçki prosesini müşahidə etməkdən imtina etməsi bu seçkilərin Avropa standartlarına və Azərbaycanın beynəlxalq təşkilatlar qarşısındakı öhdəliklərinə uyğunluğu barədə şübhələri artırır. Belə şəraitdə namizəd olaraq seçkilərə qatılmaq məqsədəuyğun deyil və namizədlik statusundan imtina etmişəm.” – deyə Elçin Məmməd bildirib. Xatırladaq ki, hüquq müdafiəçisi ötən həftə namizədliyinin rəsmən qeydə alınması üçün tələb olunan imzaları toplayıb sənədlərini Dairə Seçki Komissiyasına təhvil verib. Bu gün isə onun namizədliyinin rəsmən qeydə alınması məsələsinə baxılmalı idi. Elçin Məmməd 2005 və 2010-cu illərdə də 42 saylı Sumqayıt 2-ci seçki dairəsindən deputatlığa namizəd olub. 2010-cu ildə onun namizədliyi DSK tərəfindən qeydə alınmayıb və yuxarı instansiyalar da bu qərarı qüvvədə saxlayıb. Lakin seçkiyə 4 gün qalmış Ali Məhkəmənin qərarı ilə Elçin Məmmədin namizədliyi rəsmən qeydə alınıb.