"Biz üzdə görünən piyadaları müəyyən etmişik. Hazırda isə onların arxasında duran qüvvələri araşdırırıq”.
Bunu Türkiyənin baş naziri Əhməd Davudoğlu "TRT Haber”ə Ankarada 102 nəfərin ölümü ilə nəticələnən dəhşətli terror aktı barədə məlumat verərkən deyib.
Onun sözlərinə görə istintaq ciddi şəkildə təhqiqat aparır və terrorçuların təması haqqında önəmli məsələlər ortaya çıxır.
Hökumət başçısı bildirib ki, təhqiqat nəticəsində aysberqin görünən hissəsi üzə çıxıb.
"Başqa əlaqələri araşdırmaq istiqamətində gərgin iş aparılır. Biz hadisənin detallarını bilirik, amma bunu istintaq baxımından açıqlaya bilmərik. Bu terror aktının içərisində İŞİD təməl aktyor olaraq var”,-deyə Ə. Davudoğlu qeyd edib.
Məlumat üçün bildirək ki, oktyabrın 10-da Ankarada baş verən dəhşətli terakt nəticəsində 102 nəfər ölüb. Terror hadisəsinə görə heç bir qruplaşma məsuliyyəti öz üzərinə götürməyib.
İlkin ehtimallara görə terroru "İslam dövləti” (İŞİD) terror təşkilatı törədib. Lakin bəzi versiyalarda bildirilir ki, Suriyanın kəşfiyyat idarəsi "Əl-Muhaberat” Türkiyəyə xəbərdarlıq etmək üçün belə bir addım atıb
Lakin bütün bu iddialar hələ ki, rəsmi təsdiqini tapmayıb(Modern.az)
Xəbərdən istifadə edərkən istinad etmək vacibdir.
