Noyabrın 1-də Milli Məclisə keçiriləcək seçkilərlə əlaqədar 42 saylı Sumqayıt ikinci seçki dairəsində hazırlıq işləri yekunlaşır. Dairə 38 seçki məntəqəsini əhatə edir. Məntəqələrin hər biri zəruri texniki vasitə və metodiki vəsaitlərlə, elektrik enerjisi və rabitə şəbəkəsi ilə təmin olunub.

AZƏRTAC-ın müxbiri seçki dairəsinə daxil olan 15 saylı seçki məntəqəsində olub, görülən işlərlə maraqlanıb. Məntəqə seçki komissiyasının sədri Nəsimi Təhməzov deyib ki, məntəqə üzrə 1110 seçici qeydə alınıb. Artıq dəqiqləşdirilmiş seçici siyahısı da məntəqədə asılıb və hər kəs öz adını siyahıda yoxlaya bilər. Seçicilərdən səkkiz nəfər ilk dəfə səsvermədə iştirak edəcək. Məntəqələrdə kabinələr quraşdırılıb, namizədlərin təbliğat-təşviqat materiallarını yerləşdirmələri üçün xüsusi lövhələr vurulub.

N.Təhməzov, həmçinin bildirib ki, məntəqə komissiya üzvləri səsvermə günü prosedurları barədə keçirilən treninqlərdə ətraflı təlimatlandırılıblar. Hazırda seçicilərə bildiriş vərəqələri paylanılır.