Noyabrın 1-də keçiriləcək parlament seçkilərində Yeni Azərbaycan Partiyası (YAP) tərəfindən namizədliyi irəli sürülmüş şəxslərin təbliğat-təşviqat kampaniyası uğurla davam edir.
Sumqayıt şəhərində kampaniya çərçivəsində seçicilərlə növbəti görüş keçirilib. 43 saylı Sumqayıt üçüncü Seçki Dairəsindən YAP-ın namizədi Muxtar Babayevin şəhərin 11-ci mikrorayonunun sakinləri ilə görüşündə çıxış edən YAP Sumqayıt şəhər təşkilatının sədri Asif İmaməliyev artıq bir neçə gündür davam edən təbliğat-təşviqat kampaniyası çərçivəsində keçirilən görüşlərdə izdihamın yaşandığını, seçicilərin bu görüşlərə böyük həvəslə gəldiklərini söyləyib. Onun sözlərinə görə, bu fəallıq şəhər ictimaiyyətinin YAP-a və partiyamızın Sədri İlham Əliyevə böyük dəstəyinin, sevgisinin bariz nümunəsidir: "Bütün görüşlərimizdə seçicilərimiz seçimlərinin YAP-ın irəli sürdüyü namizədlər olduğunu dilə gətirirlər. Bu da təsadüfi deyil. Muxtar Babayev də partiyamız tərəfindən yenidən namizədliyi irəli sürülmüş şəxslərdəndir. Muxtar müəllimin ötən beş ildəki fəaliyyəti seçicilərimiz tərəfindən yüksək qiymətləndirilir”.
Çıxış edən deputatlığa namizəd Muxtar Babayev son illərdə ölkəmizdə müşahidə olunan inkişafa diqqət çəkib. Sumqayıtda böyük müəssisələrin yaradıldığını, yeni iş yerlərinin açıldığını, işsizliyin səviyyəsinin azaldığını dilə gətirən M.Babayev bunun fonunda insanların güzəranının yaxşılaşdığını, yolların çəkildiyini, məktəblərin tikildiyini deyib: "Bu gün Azərbaycanda YAP-a rəqib ola biləcək siyasi qüvvə yoxdur. Partiyamız hər zaman xalqımızın, dövlətimizin maraqlarını şərəflə qoruyub. Partiyamızın üzvü olan millət vəkillərimiz qanunverici orqanda mühüm təşəbbüslərlə çıxış edirlər. İnanıram ki, YAP-ı təmsil edən millət vəkillərinin səmərəli fəaliyyətinin davamlı olması üçün seçicilərimiz noyabrın 1-də partiyamızın namizədlərinə səs verəcəklər”.(yeniazerbaycan.com)