Martın 31-də Vaşinqtonda keçiriləcək nüvə təhlükəsizliyi üzrə növbəti sammit Dağlıq Qarabağ münaqişəsinin nizamlanması üçün ABŞ prezidentinə unikal şans verir.

AzVision.az xəbər verir ki, bu barədə Rob Sübhani `Washington Times` nəşrində dərc olunan məqalədə qeyd edib.

"Dünya liderlərinin nüvə silahının düşmən ölkələr və ya terror təşkilatlarının əlinə keçməməsi üçün razılaşması olduqca vacibdir. Lakin həmin görüşdə Azərbaycan və Ermənistan prezidentləri İlham Əliyev və Serj Sarkisyanın olması Obama üçün Sovet imperiyasının dağılmasından sonra ən problemli münaqişələrdən birinin həll edilməsi istiqamətində unikal şans verir”, - deyə Sübhani yazıb. 

Məqalədə göstərilir ki, Ermənistan-Azərbaycan arasında genişmiqyaslı müharibə bir milyondan çox insanın qaçqın düşməsi və erməni qoşunlarının Azərbaycan torpaqlarının 20%-ni işğal etməsi ilə nəticələnib. 

"Hər iki ölkə - Azərbaycan və Ermənistan sülhün bərqərar olmasından xeyir əldə edəcək. Amerikalılar tərəfindən münaqişənin diplomatik yolla həll edilməsi istiqamətində görülən işlər münaqişədən sonrakı dövr üçün yaxşı zəmin yarada bilər”, - deyə məqalədə vurğulanır. 

Müəllifin fikrincə, ABŞ prezidenti erməni qoşunlarının işğal olunan Azərbaycan torpaqlarından çıxarılması ilə bağlı planın yaradılması istiqamətində hər iki prezidentlə işləməlidir. 

"Obama Azərbaycan və Ermənistan prezidentlərini inandırmalıdır ki, ABŞ onlara kürəyini dönməyəcək və işə yarayacaq razılaşma hər iki xalqı təmin edəcək, hər iki ölkə vətəndaşlarına bir yerdə yaşamaq imkanı verəcək və dünyanın bu sabit olmayan regionunda qonşu ölkələr arasında qarşılıqlı inamın yaranmasına şərait yaradacaq”, - deyə müəllif qeyd edib.