Ölkələr anlaşır, maliyyələr ayrılır, amma qaçqınlar dənizdə boğulmaqda davam edir
Avropaya axın edən qaçqınlar və onların taleyi ilə bağlı durum öz kritikliyini qoruyur. Son olaraq aprelin 18-də qeyri-leqal yolla Avropaya getmək istəyən miqrantların batması ilə nəticələnən irimiqyaslı gəmi qəzası baş verib.
Aralıq dənizində göyərtəsində miqrantlar olan gəmi batıb. Hadisə nəticəsində 400 nəfərin öldüyü bildirilir. İtaliyaya üz tutan gəmi Misir sahillərində qəzaya uğrayıb. Məlumata əsasən, ölənlərin əksəriyyəti Somali vətəndaşlarıdır.
400 miqrantdan 29-u xilas edilib
Somalinin Misirdə olan səfiri "BBC”-yə verdiyi müsahibədə 400 miqrantın Aralıq dənizində boğulduğunu bildirib. Əsasən Somali, Efiopiya və Eritreyadan olan bu miqrantlardan yalnız 29-u xilas edilə bilib. Məlumata görə, miqrantlar öz səfərlərinə Misirdən başlayıblar. Bundan əlavə, Liviya sahillərində qayığın batması nəticəsində daha 8 nəfərin öldüyü bildirilir.
Avropa Parlamentinin prezidenti bildirib ki, Ankara Avropa İttifaqından miqrant böhranının həlli üçün Türkiyəyə ediləcək yardımın iki dəfə artırılmasını istəyir.
Avropa İttifaqının nümayəndələri Türkiyə rəsmiləri ilə miqrant böhranını Brüsseldə zirvə görüşündə müzakirə ediblər. Minlərlə qaçqın Yunanıstan-Makedoniya sərhədini keçmək üçün gözləyir. Avropa Parlamentinin prezidenti Martin Şulz deyib ki, Türkiyə qaçqınların Avropaya keçməsinin qarşısını almaq üçün əlavə olaraq 3,3 miliyard dollar istəyib.
Keçən il noyabr ayında Avropa İttifaqı Ankaraya miqrant böhranının həlli məqsədilə 3,3 milyard dollar yardım etməyə razı olmuşdu. Avropa Parlamentinin prezidenti bildirib ki, Ankara Avropa İttifaqından miqrant böhranının həlli üçün Türkiyəyə ediləcək yardımın iki dəfə artırılmasını istəyir.
Türkiyə 2.7 milyon qaçqına miqrant statusu verib
"Reuters”in məlumatına əsasən, Aİ və Türkiyə arasında miqrant böhranı barədə razılaşmada deyilir ki, Türkiyə Yunanıstana qeyri-qanuni yolla keçən miqrantları müvəqqəti olaraq geri götürməyə razıdır. Bunun əvəzində Aİ Türkiyə vətəndaşları üçün viza rejiminin tətbiq edilməsini aradan qaldıracaq və ölkənin ittifaqa üzvlük məsələsini sürətləndirəcək.
Türkiyə Suriyadan gələn 2,7 milyondan çox qaçqına sığınacaq verib. Avropanın başqa ölkəri və Suriyanın digər qonşuları kimi, Türkiyə də qaçqınların xidmətlərlə təmin edilməsində çətinliklərlə qarşılaşır.
NATO bazar günü Yunanıstan və Türkiyəyə böhranın daha da dərinləşməsinə gətirib çıxarın insan alveri halları və cinayətkar qruplarla mübarizə məqsədilə Egey dənizində gəmilər yerləşdirildiyini elan edib.
Miqrantlar Yunanıstandan çıxa bilmir
Bu arada Yunanıstanda da durum xoşagələn deyil. Sərhədlərin bağlanması 50 min qaçqının Yunanıstanda ilişib qalmasına səbəb olub. Afinanın Piraeus limanı geri dönə bilməyən qaçqınların əsas dayanacağına çevrilib. Lakin hökumət iqtisadiyyata təkan vermək məqsədilə önümüzdəki turist mövsümünə hazırlaşdığı üçün qaçqınları başqa bir yerə köçürməyə səy göstərir. Amma bu vəziyyət hər kəsin xoşuna gəlmir.
İqtisadi baxımdan zəifləyən Yunanıstanın çox ehtiyacı olduğu turist mövsümü yaxınlaşdığı üçün hökumət qaçqınları köçürməyə qətiyyətlidir: "Onlar burada işlərin bərpa olunması məqsədilə bu müvəqqəti tranzit stansiyanı təmizləmək və normal vəziyyətinə qaytarmaq istəyirlər”.
Anlaşma qaçqınların sayını azaldıb
Avropa İttifaqı (Aİ) və Türkiyə arasındakı miqrasiya sazişinin tətbiqi Egey dənizi vasitəsilə Yunanıstana çatmağa çalışan mühacirlərin sayını azaldıb.
Bu barədə "Frontex” Aİ-nin xarici sərhədlərin nəzarəti üzrə Avropa agentliyi məlumat bildirir.
Xatırladaq ki, martın 18-də Aİ-nin liderləri və Türkiyənin baş naziri Əhməd Davudoğlu arasında Türkiyədən Yunanıstana gələn qanunsuz miqrantların geri qaytarılmasına dair saziş imzalanıb.
Bunun əvəzində Türkiyə və Aİ arasında vizasız rejim tətbiq olunacaq, 3 milyard avro kompensasiya ödəniləcək. Bundan başqa, Aİ Türkiyə ərazisindən qanuni əsaslarla gələn süriyalı qaçqınları qəbul etmək barədə öhdəlik götürüb.
"Frontex"in məlumatına əsasən, martda Yunanıstana 26 460 mühacir daxil olub və bu rəqəm fevral ayı ilə müqaisədə iki dəfə azdır.
Mühacirlərin ümumi sayından təxminən 23 000 Yunanıstana, Aİ-Türkiyə arasındakı imzalanan sazişdən əvvəl daxil olub.
"Frontex" qeyd edir ki, Yunanıstana mühacir axınının azalması aprel ayında da müşahidə olunur. (Musavat.com)
Xəbərdən istifadə edərkən istinad etmək vacibdir.
