Almaniya Bundestaqının millət vəkili və CDU/CSU fraksiyasının Azərbaycan üzrə məruzəçisi Kristof Berqnerin Azərbaycana dörd günlük səfəri başa çatıb.
Almaniyanın Azərbaycandakı səfirliyindən "Report"a verilən məlumata görə, səfər müddəti ərzində K.Berqner Milli Məclisdən olan həmkarları ilə görüşüb və Xarici İşlər Nazirliyi və Mədəniyyət və Turizm Nazirliyinin yüksək vəzifəli nümayəndələri ilə danışıqlar aparıb.
Bundan başqa, o, Yasamalda və Masazırda məskunlaşmış məcburi köçkünlərin həyat şəraiti ilə tanış olub və Sumqayıt şəhərində alman əsirlərinin dəfn olunduğu qəbristanlıqda əklil qoyub.
Millət vəkili həmçinin ADA Universitetində tələbələrlə Avropa Şərq Tərəfdaşlığı mövzusunda və regionda baş verən son hadisələrlə əlaqədar müzakirə aparıb.
Azərbaycanın qərb rayonlara ziyarəti zamanı isə almaniyalı deputat Göygöl, Şəmkir və Gədəbəydə vaxtilə orada məskunlaşmış alman köçkünlərdən qalan irslərlə tanış olub və bu regionların icra hakimləri ilə görüşüb.