Rusiyanın Azərbaycandakı səfirliyi bu ölkənin rəhbəri Vladimir Putinin Bakıya səfər edəcəyi ilə bağlı yerli KİV-lərdə yayılan məlumatlara münasibət bildirib.
Səfirlikdən verilən özəl açıqlamada bildirilib ki, hazırda onlarda bu barədə dəqiq məlumat yoxdur.
Diplomatik nümayəndəlik Putinin Azərbaycana səfərinin reallaşacağını istisna etməyib.
"Biz KİV-də Vladimir Putinin səfəri ilə bağlı yayılan məlumatları izləyirik. Hələlik səfərlə bağlı bizdə dəqiq informasiya yoxdur. Bu baxımdan dəqiq fikir söyləyə bilmərik. Səfərin may ayında baş tutub-tutmayacağına dair səfirliyə məlumat daxil olmayıb. Hesab edirik ki, belə məlumatların KİV-də yayılması hələ tezdir”-deyə Rusiyanın Bakıdakı səfirliyindən bildirilib.
Qeyd edək ki, "İnterfaks-Azərbaycan” agentliyinin hökumətdəki mənbələrə istinadən yaydığı məlumata görə, Rusiya prezidenti Vladimir Putin bu ilin may ayının sonlarında Azərbaycana səfərə gələcək.
Səfərin məqsədi Dağlıq Qarabağ münaqişəsinin həlli ilə bağlıdır.
"Çox güman ki, səfərin məqsədi Azərbaycan rəhbərliyi ilə Ermənistan-Azərbaycan münaqişəsinin tənzimlənməsi yollarının, o cümlədən Ermənistan və Azərbaycan qoşunlarının təmas xəttində son zamanlar yaranmış vəziyyətin müzakirəsi olacaq”, - mənbə bildirib.
Putinin İrəvanada gedəcəyi istisna deyil.
azvision.az