Ötən həftə İrəvanda səfərdə olan Rusiya xarici işlər naziri Sergey Lavrov bu gün Bakıya gələcək. Səfər iki gün davam edəcək. Rusiya XİN-in yaydığı bəyanatda bildirilib ki, Bakıda ikitərəfli görüşlər zamanı aktual məsələlərin müzakirəsi, Vyana və Sankt-Peterburq sammitlərində Dağlıq Qarabağ probleminin nizamlanması üzrə əldə olunan razılaşmaya dair fikir mübadiləsinin aparılması nəzərdə tutulub.

"Atlas” Araşdırmalar Mərkəzinin rəhbəri, politoloq Elxan Şahinoğlu hesab edir ki, Lavrovun gəlişində əsas məqsəd Rusiya prezidenti Vladimir Putinin planlaşdırılan səfərinə hazırlıq xarakteri daşıyır: 

"Putin avqustda İran və Azərbaycan prezidentləri ilə birgə görüşdə iştirak etmək üçün Bakıya gələcək. Prezidentlərin üçtərəfli görüşündə əsas müzakirə olunacaq məsələ Şimal-Cənub dəhlizinin reallaşmasıdır. Bununla belə Putinin səfərinə hazırlaşmaq lazımdır, səfərin proqramı müəyyənləşdirilməlidir”. 

E.Şahinoğlunun fikrincə, Lavrovun səfəri zamanı Dağlıq Qarabağ məsələsi ilə bağlı müzakirələr də aparılacaq:

"Düşünmürəm ki, Rusiya münaqişəni həll etmək üçün ciddi addımlar atmağa hazırdır. Sankt-Peterburq görüşündən elə də böyük vaxt keçməyib. Bizim əsas istəyimiz prezident İlham Əliyevin də vurğuladığı kimi mərhələli həll planının işə düşməsidir. Amma, bu istiqamətdə iş yoxdur. Rusiya rəsmilərindən eşitməmişik ki, münaqişənin mərhələli həlli ilə bağlı ciddi addımlar atıla bilər. Onlar eyni fikirləri səsləndirirlər. 

Sözsüz ki, Lavrov Bakıda münaqişə ilə bağlı müəyyən istiqamətlərdə fikir mübadiləsi aparacaq. Amma, konkret təkliflərin olacağını düşünmürəm. Çünki, Rusiyanın əlində olan Kazan prinsipləridir. Ola bilsin ki, onlar bu prinsiplərdə müəyyən korrektələr etməklə məşğuldurlar. Yenə də danışıqlar prosesi və verilən açıqlamalar göstərir ki, hələ də tərəflərin mövqeyi 180 dərəcə fərqlidir. Biz haqlı olaraq münaqişənin mərhələli həll planını istəyirik. Ermənistan isə referendum məsələsini başa gətirməyə çalışır. Ona görə də mövqelərin yaxınlaşdırılması üçün ortada nə konkret plan var, nə də hər hansı bir ciddi detal”.

 

E.Şahinoğlu qeyd edib ki, son zamanlar böyük dövlətlər Dağlıq Qarabağ münaqişəsi ilə bağlı danışıqları intensivləşdirməklə özlərinin hiyləgər istəklərinə çatmaq istəyirlər: "Bütün zamanlarda avqust ayı atəşkəsin intensiv pozulması halları ilə yadda qalır. Aprel döyüşlərindən sonra böyük dövlətlər gördülər ki, müharibənin başlaması təhlükəsi yüksəkdir. Ona görə də münaqişənin həllini sürətləndirməsələr belə ard-arda gerçəkləşən səfərlərlə, danışıqlarla hər iki tərəfi atəşkəsin intensiv pozulmasından uzaq saxlamağa çalışırlar. İki-üç ay belə etdilər, bəs sonar necə olacaq? Danışıqlarda nəticə olmasa, yenidən atəşkəsin intensiv pozulması halları artacaq. Hələlik böyük dövlətlərin taktiki maraqları budur ki, müharibə başlamasın. Bunun üçünsə, tərəfləri daim intensiv danışıqlara cəlb etməyə çalışırlar”.