İlham Əliyev: "Ədaləti bərpa edəcəyik, həm ölkə daxilində, həm beynəlxalq müstəvidə”
"Azərbaycanda ünvanlı sosial yardım ilə bağlı problemlər olub". APA TV-nin xəbərinə görə, bunu prezident İlham Əliyev Bakının Sabunçu rayonunun Yeni Ramana qəsəbəsində Sağlamlıq İmkanları Məhdud Gənclərin Peşə Reabilitasiya Mərkəzinin açılış mərasimindən sonra deyib. Dövlət başçısının sözlərinə görə, ünvanlı sosial yardımların verilməsində ədalətsizliklər olub, yardıma ehtiyacı olanlar yardım ala bilmədiyi halda, ehtiyacı olmayanlara müəyyən şərtlərlə yardımlar verilib: "Mən əminəm ki, Əmək və Əhalinin Sosial Müdafiəsi Nazirliyi bütün xoşagəlməz halları yaxın zamanda aradan götürəcək. Artıq işlər başlanıb. Ciddi təmizlik işləri aparılır, rüşvətə, korrupsiyaya bulaşmış məmurlar işdən çıxarılır. Mən bunu alqışlayıram. Hər bir yerdə belə olmalıdır. Ədalət və eyni münasibət hamıya olmalıdır və olacaq".
Prezident İlham Əliyev məmurlara bir daha xəbərdarlıq edib: "Bu gün məni bütün məmurlar bir daha eşitsinlər. Mən bu barədə dəfələrlə demişəm. Azərbaycan dövləti korrupsiyaya, rüşvətxorluğa qarşı bundan sonra da çox ciddi və güzəştsiz, amansız mübarizə aparacaq. Ədalət prinsipləri hər yerdə bərqərar olmalıdır. Həyatda, ailədə və cəmiyyətdə ədalət həmişə zəfər çalmalıdır".
Dövlət başçısı bildirib ki, həm dövlət qurumları, həm də özəl qurumlar əlilləri işə götürərkən ayrı-seçkiliyə yol verməməlidirlər.
Xəbərdən istifadə edərkən istinad etmək vacibdir.
