Milli Şuranın Sədr Aparatının formalaşdırılmasından sonra onun İdarə Heyətinin yaradılması prosesinə də start verilib.

Bu haqda musavat.com-a Milli Şura sədrinə yaxın mənbələrdən məlumat daxil olub. Həmin məlumata görə, artıq Milli Şuranın İdarə Heyətinin layihə-siyahısı hazırlanıb və tanış olmaq üçün təsisçi təşkilatlara göndərilib.

İddia olunur ki, Milli Şuranın rəhbər strukturuna hər təsisçi təşkilatdan iki nəfər salınıb. Əlavə olaraq müstəqil ictimaiyyətçilər, tanınmış ziyalıların bəziləri də siyahıya salınıblar. Məsələnin maraqlı tərəfi isə budur ki, bütün bunlar ictimaiyyətə və mediaya qapalı şəkildə həyata keçirilir. 

Milli Şuranın narazı üzvlərindən biri deyib ki, bu proses şəffaf deyil, prinsiplər məlum deyil; İdarə Heyətini isə ancaq sessiya müəyyən edə və seçə bilərdi: “Hətta sədrin də bu səlahiyyəti yoxdur. Sədrə ancaq Sədr Aparatını formalaşdırmaq həvalə olunmuşdu. İdarə Heyəti məsələsi barədə sessiyada qərar verilməyib”. 

Məlumatlara görə, ötən ilin sonlarında təsisçi təşkilatlardan ikisi İdarə Heyəti layihə-siyahısı ilə bağlı özünün neqativ münasibətini Cəmil Həsənliyə bildirib. Bəzi Milli Şura üzvləri isə narahatdır ki, İdarə Heyəti bir partiyanın (AXCP) dominantlığı əsasında formalaşdırılacaq.

Məsələ ilə bağlı Milli Şuradakı qurumlardan bir neçəsinin məsələ ilə bağlı mövqeyi də öyrənilib. Müsavat Partiyası Mərkəzi İcra Aparatının rəhbəri Arif Hacılı bildirdi ki, Milli Şuranın strukturunun formalaşması və bundan sonrakı fəaliyyətlərlə əlaqədar müəyyən məsləhətləşmələr gedir. Bu müzakirələrdə Müsavat Partiyası da iştirak edir və hazırlanan layihələrdən xəbərdardır. 

AXCP sədrinin müavini Fuad Qəhrəmanlı bildirdi ki, təmsil olunduğu partiyaya belə bir layihə-siyahının daxil olduğundan xəbərsizdir: “Daxil olsaydı, məlumatım olardı. Mən maraqlanmışam, nizamnaməyə dəyişiklik edilməsi və idarəedici strukturun formalaşdırılması ilə bağlı layihələrin hazırlandığı barədə məlumatlıyıq”.