Yanvarın 17-i Bakı Apellyasiya Məhkəməsində həbsdə olan sabiq səhiyyə naziri Əli İnsanovun Nəsimi Rayon Məhkəməsinin qərarından verdiyi apellyasiya şikayəti üzrə məhkəmənin ilkin baxış iclası keçirilib.
Hakim Sənan Hacıyev məhkəmə zalında Ədliyyə Nazirliyinin nümayəndəsi olamadan prosesin davam etməsinə münasibətini soruşub.
Əli İnsanov cavabında bildirib ki, o nəyə arxayındır ki, nəinki özü gəlib, heç nümayəndəsini də məhkəməyə göndərməyib. “Mən bu ittihamda əsas şəxs kimi ədliyyə naziri Fikrət Məmmədovu göstərmişəm. O nəyə arxayındır ki, nəinki özü gəlib, heç nümayəndəsini də məhkəməyə göndərməyib. Vəsatət qaldırıram, Azərbaycan Respublikasının ədliyyə naziri Fikrət Məmmədov məhkəməyə dəvət edilsin, mənim ona çoxlu suallarım olacaq. Mənim ittiham edildiyim cinayətlərin səbəbkarı birbaşa o özüdür. Bu Fikrət Məmmədov nə vaxtdan Əli İnsanovu saymır? O, xalası oğlu İlham Əliyevə arxayındır?”
Prosesdə iştirak edən Penitensiar Xidmətin təmsilçisi məhkəməyə ədliyyə nazirinin iştirakına ehtiyac görmədiyini söyləyib. O bildirib ki, iddia ərizəsində ədliyyə naziri cavabdeh qismində göstərilmir, buna görə də onun burada iştirakı gərəksizdir.
Yenidən söz alaraq çıxış edən Əli İnsanov hakimə öz iradlarını bildirib. “Hörmətli hakim, siz işləri uzadırsınız, belə getməyəcək. Xahiş edirəm, verilən vəsatətlərə düzgün izahat verin, “baxacağıq”, “edəcəyik”lə olmaz. Hardadır bu məmləkətin ədaləti, ədalət naziri heç saymır sizi. Mənim iddialarıma qarşı heç cavab vermir, bir etibarnəmə belə vermir ki, kimsə onun yerinə məhkəmədə iştirak etsin. Yanındakıları idarə edə bilmir, buna baxmayaraq, o boyda nazirliyi idarə edir. Burda da bizə işgəncələr verir. Onun gəlməməsi sizin üçün də şərait yaradır, onsuz da siz bəhanə axtarırsınız ki, məhkəmə prosesi uzansın. Belə getsə təxirə sala-sala 2015-ci ilə qədər gedəcək”./müsavat.com/
Virtualaz.org xəbər verir ki, Ə.İnsanov NİDA Vətəndaş Hərəkatını dəstəklədiyini bildirib və həbsdə olan gənc fəalların valideynlərinə təşəkkür edib: “Hüqo deyirdi ki, diktatura və inqilab əkiz qardaşdır. Bu ölkədə diktatura var. İnqilabı da NİDA vətəndaş hərəkatı başlayıb və bu proses başa çatacaq. Azərbaycanın gələcəyi və Azərbaycan inqilabı bu gənclərlə bağlı olacaq...”
Məhkəmə yanvarın 31-də saat 14:30 da davam edəcək.
Bundan sonra hakim Sənan Hacıyev məhkəmə prosesini yanvar ayının 31- i saat 11:00- a təxirə salıb.
Prosesdə hakim tərəfindən qısa müddətli audio və video çəkilişə icazə verilib.
Qeyd edək ki, bir müddət əvvəl Ali Məhkəmənin Plenumunda Avropa İnsan Hüquqları Məhkəməsinin (AHİM) sabiq səhiyyə naziri Əli İnsanovla bağlı qərarına baxılıb. Plenumun qərarına əsasən Əli İnsanov barəsində Apellyasiya Məhkəməsinin və Ali Məhkəmənin qərarları ləğv edilib, birinci məhkəmə instansiyanın qərarı isə dəyişdirilməyib və Ə. İnsanov həbsdən azad edilməyib. İş araşdırılması üçün yenidən Bakı Apelyasiya Məhkəməsinə göndərilib.
Xatırladaq ki, Əli İnsanov 2005-ci ildən həbsdədir. O, korrupsiyada ittiham olunaraq 11 il azadlıqdan məhrumetmə cəzası alıb. AİHM ötən il martın 14-də Ə. İnsanovun iddiası üzrə qərarını açıqlayıb. Qərarda Ə. İnsanovun İnsan Hüquqları üzrə Avropa Konvensiyasının 3-cü maddəsi üzrə (işgəncə faktı), 6-cı maddəsinin 1-ci və 3-cü paraqrafları (ədalətli məhkəmə hüququ) üzrə iddiaları təmin edilib. Qərarda eyni zamanda Azərbaycan hökumətinin Ə. İnsanova 10 min avro məbləğində kompensasiya ödəməli olduğu da qeyd olunub.
Xəbərdən istifadə edərkən istinad etmək vacibdir.
