Dünən söz verdiyim kimi, Arif Rəhimzadənin "biz türk deyilik, azərbaycanlıylıq” ifadəsi və ona olan münasibətlə bağlı fikirlərimi sizə çatdırıram. Bir daha təkrar edirəm, bu məsələyə olan reaksiya problemin qəsdən şişirdildiyinə şübhə yeri qoymur. Bəri başdan qeyd edim ki, Arif Rəhimzadədən heç vaxt xoşum gəlməyib və bu gün də gəlmir. Onun kimliyi barədə 2010-cu ildə işıq üzü görmüş "Sumqayıt SSRİ-nin süqutunun başlanğıcı” kitabımda ətraflı yazdığımdan bir cümlə ilə onun haqqındakı fikrimi bildirim. A.Rəhimzadə 1991-ci ildə Müstəqillik Aktının əleyhinə səs vermiş şəxsdir.
Bununla belə, bu müzakirələrdə ona qarşı olan qərəzi göstərmək üçün bir neçə halı diqqətinizə çatdırım. Bundan az əvvəl, ömrü boyu türkçülüyün və Türkiyənin əleyhinə çıxış etmiş deputat Araz Əlizadənin Türkiyə Dövləti haqqında aşağılayıcı fikirləri daha zərərli olsa da çoxları, xüsusilə hakimiyyətə yaxın qüvvələr tərəfindən tamamilə cavabsız qaldı. Bundan başqa, A.Rəhimzadə tirajlanan fikirlərin ona məxsus olmadığını deməsinə baxmayaraq, canfəşanlıq edən heç kim, çıxışın rəsmi mərasimdə olmasına baxmayaraq, mənbəni göstərmədi. Yəni bu qədər haray - həşir, dedi - qodu əsasında baş verir. Bəllidir ki, bütün TV-lər hakimiyyət klanlarına məxsusdur və göstərişsiz heç kim bu cür kampaniya başlaya bilməzdi. Ancaq ATV kanalında bir şoumenin A.Rəhimzadənin fikirlərini təhlil, özünü isə linç etməsi, başa düşmədiyi anlayışlarla janqlyorluq göstərməsi qərəzin nümayişi idi. Həmin fikirlər A.Rəhimzadəyə məxsus olsa belə, onun harada səslənməsini (deyilənlərə görə çıxış Rusiya auditoriyasına ünvanlanıb) nəzərə alsaq, burada qəbahətli heç nə görmürəm, çünki siyasətçilərin bəzən bildikləri yox, həmin məqamda lazım olan fikirləri söyləməsi qəbul ediləndir.
İndi isə əsas məqamı nəzərinizə çatdırıb bu məsələdə hamını çox diqqətli olmağa çağırıram. Türkçülük söhbəti həmişə Azərbaycan ətrafında və daxilində təhlükəli proseslər gedəndə ortaya atılır. Bunu 1990-cı ilin əvvəllərində hamımız görmüşük. Bu gün də bu məsələnin bu qədər şişirdilməsinin təsadüfi olmasına inanmıram. Xüsusilə, ATV kanalındakı verilişin Azərbaycanda yaşayan digər millətlərdə narazılıq doğurduğuna əminəm. Danışığını bilməyən birisinin başqa millətlər haqqında yekəxanalıqla "onlar da bizim qardaşlarımızdır” ifadəsi ən azından savadsızlıqdır. Azərbaycan tək türkün yox, burada yaşayan bütün millətlərin Vətənidir. Heç kim burada özünü böyük qardaş kimi aparmamalıdır. Haqqımda müzakirələr açmaq istəyənlərə isə bildirirəm ki, özüm türkəm. Azərbaycan, mənim qədər də burada yaşayan talışın, ləzginin, kürdün, avarın, tatın, udinin, ingiloyun və digər millətlərin nümayəndələrinin də Vətənidir. Bu məsələdən hansısa siyasi məqsədlər üçün istifadə etmək istəyənlərə isə deyirəm ki, odla oynamayın, özünüz yanarsınız.
Xəbərdən istifadə edərkən istinad etmək vacibdir.
