"Miqrasiya və qaçqınlar problemi ictimaiyyəti narahat edən problemlərdəndir. Bunun həlli birgə əməkdaşlığı tələb edir”.
Xeberle.com-un APA-ya istinadən xəbərinə görə, bunu Azərbaycan xarici işlər nazirinin müavini Xələf Xələfov Bakıda keçirilən Avropa Şurası Parlament Assambleyasının (AŞPA) Qaçqınlar və Məcburi Köçkünlər üzrə Komitəsinin iclasında deyib.
O bildirib ki, bəzi hallarda sabitlik hansısa iqtisadi, siyasi maraqların təmin olunmasına görə pozulur: "Azərbaycan münaqişələrin beynəlxalq hüquq normaları çərçivəsində həll edilməsinin tərəfdarıdır. Təəssüflər olsun ki, bu problemlər terrorçuluğa, qaçaqmalçılığa zəmin yaradır”.
X.Xələfov qeyd edib ki, Ermənistan Azərbaycan topraqlarını işğal edib, nəticədə insanlar yaşadığı ərazilərdən köçkün düşüb, bu da insan hüquqlarının pozulmasıdır: "Azərbaycan həm beynəlxalq səviyyədə, həm də ölkə daxilində qaçqın və məcburi köçkünlərə yardımını əsgirgəməyib. Amma Azərbaycanda həmin şəxslərin hüquqları öz doğma yurdlarına qayıdandan sonra təmin ediləcək”.
Xarici işlər nazirinin müavini bildirib ki, Ermənistan işğal olunmuş Azərbaycan ərazilərində narkotik, silah və insan alveri ilə məşğul olur: "Azərbaycan bununla bağlı beynəlxalq təşkilatlara müraciət edib. Bu məsələyə baxışda ikili standartlar var. Ermənilər Azərbaycan ərazilərini işğal edib, tarixi abidələri məhv edib, təbii sərvətlərimizi istismar edir. Bunların hamısı beynəlxalq hüquq pozuntularıdır və Ermənistan buna görə məsuliyyət daşıyır”.
X.Xələfov vurğulaylıb ki, ermənilər tərəfindən 1992-ci ildə Xocalıda soyqırım törədilib: "Bəzi dövlətlər buna biganə yanaşır. Dünya dövlətlərinin bir çoxu bu faciəni tanıyıb. Bu, insanlıq əleyhinə cinayətdir. Ermənistan beynəlxalq hüququn tələblərinə məhəl qoymur. Ərazilərdə qanunsuz miqrantları yerləşdirir. Xaricdə yaşayan ermənilər Ermənistanın avantürasına uymamalıdır. Azərbaycan tezliklə topaqlarını işğaldan azad edəcək, bununla da regionda sülh bərpa olunacaq”.

Xəbərdən istifadə edərkən istinad etmək vacibdir.