Sumqayıt hadisələrinin araşdırılması zamanı SSRİ Baş Prokurorluğu tərəfindən aparılan istintaq prosesi çərçivəsində bir çox qüsurlara, nöqsanlara yol verilib.
APA-nın xəbərinə görə, bunu Xarici İşlər Nazirliyinin şöbə müdiri Hikmət Hacıyev 1988-ci ilin fevralında Sumqayıt şəhərində törədilmiş kütləvi iğtişaşlara həsr olunmuş “Sumqayıt, 1988. Cinayət və cəza” kitabının təqdimat mərasimində bildirib.
Onun sözlərinə görə, Azərbaycan Baş Prokurorluğu tərəfindən yeni istintaq tədbirləri görülüb, istintaq hərəkətləri həyata keçirilib, nəticədə bir çox qaranlıq qalan məqamlar tamamilə öz mahiyyəti ilə açılıb. Şöbə müdiri vurğulayıb ki, Sumqayıt Azərbaycanın Qarabağ savaşının tərkib hissəsi olaraq uzun müddətli bir strategiyadır: “Bu sahədə alimlər 26 ildən artıqdır ki, fəaliyyət göstərirlər və işlər bundan sonra da davam edəcək. Bizim qarşımızda hələ böyük bir yol durur. Ona görə də bir çox təkliflərlə çıxış etmək istərdim. Belə ki, bu gün təqdimatı keçirilən kitabda bütün hüquqi sənədlər və istintaq materialları verilib. Lakin hüquqi sənədlər və istintaq materialları bir qədər üslub və tərtibat baxımından çətin sənədlərdir. Ona görə də bu sənədlərin analitik və müqayisəli təhlili verilsəydi, oxucu üçün daha aydın olardı. Əsərdə erməni arqumentlərinə də yol verilsəydi, pis olmazdı. Erməni arqumentlərinin addım-addım, fakt-fakt təkzib edilməsi çox faydalı olardı”.
XİN rəsmisi qeyd edib ki, Azərbaycan xalqı öz tarixindən heç bir zaman utanmayıb: “Bizim fəxarətli bir tariximiz var. Sumqayıt hadisələri ilə əlaqədar hüquqi sənədlər də sübut edir ki, biz utanmırıq və əlimizdə əsaslar var”.
Hikmət Hacıyev vurğulayıb ki, SSRİ Baş Prokurorluğu tərəfindən Sumqayıt hadisələrinin araşdırılması üçün 230 nəfərdən ibarət istintaq qrupu təşkil olunub: “O qrupun üzvlərinin əksəriyyəti bu gün keçmiş SSRİ məkanında təqaüddə olan istintaqçılar və hüquq-mühafizə orqanları əməkdaşlarıdır. Kitabda onlarla da istintaq xarakterli deyil, elmi və jurnalist xarakterli müsahibələrin təşkil edilməsi faydalı olardı. Onlar təqaüddə olan insan kimi açıq şəkildə danışa bilərdilər. Mən əminəm ki, Baş Prokurorluq digər ölkələrlə mövcud əməkdaşlığı çərçivəsində bu işi təşkil edə bilər. Xarici İşlər Nazirliyi və diplomatik nümayəndəliklər bu kontaktların yaradılmasında öz funksiyalarını yerinə yetirmiş olarlar”.
Xəbərdən istifadə edərkən istinad etmək vacibdir.
