"Serj Sarkisyanın "İsgəndər” raketlərindən istifadə edilməsinə əmr verəcəyi ilə bağlı bəyanatı Ermənistan cəmiyyətinə ünvanlanmış mesajdır. Aprel döyüşlərindən sonra Ermənistanın bel sütunu sınmışdı. İndi də Sarkisyan istəyir ki, əhalidə özlərinə qarşı inam yaratsınlar, ruh düşkünlüyü olmasın, seçkidə qalib çıxsınlar. Yəni bu, siyasi bir gedişdir ki, Sarkisyan edir və ancaq Ermənistan daxilinə ünvanlanmış bir müraciətdir”.
Xeberle.com xəbər verir ki, bunu Moderator.az-a açıqlamasında sabiq müdafiə naziri, general-mayor Tacəddin Medhiyev Ermənistan prezidenti Serj Sarkisyanın "İsgəndər” raketləri ilə bağlı bəyanatı haqqında danışarkən deyib.
T.Mehdiyev qeyd edib ki, "İsgəndər” raketləri camaatda qorxu hissi yaratmamalıdır:
"Nüvə başlığına malik olmayan hər hansı bir silah elə də böyük dağıdıcı, sarsıdıcı gücə sahib deyil. Həm də bizim İsrailin istehsalı olan ən müasir raketəleyhinə silahlarımız var. Əgər Ermənistan dediyi raketlərdən istifadə edərsə, həmin raketlər heç Azərbaycanın ərazisinə gəlmədən belə məhv edilə bilər. Bundan əsla qorxmaq lazım deyil. Azərbaycan ordusunun elə hərbi texnikası var ki, onların sayəsində raketlər yerindən qalxanda belə hansı istiqamətə yönəldiyi, hansı istiqamətdən qarşısını ala biləcəyimiz bizə məlum olacaq. Ermənistanın bizə "İsgəndərlə” xox gəlməsi ağlabatan deyil”.
Sabiq nazir onu da qeyd edib ki, Azərbaycan ordusu aprel ayında ayıq-sayıqlığını gücləndirməlidir:
"Əminəm ki, bu sahədə böyük işlər aparılır və hər hansı bir təxribatın qarşısı müvəffəqiyyətlə alınmalıdır. Bizdə hazırda elə kəşfiyyat avadanlıqları var ki, 100 km-dən artıq məsafədən belə düşmənin hansı istiamətdən hərəkətə keçəcəyini müəyyən edə bilirlər. Buna görə də ilk növbədə böyük kəşfiyyat işləri aparılmalıdır, kəşfiyyatın bütün növlərindən istifadə olunmalıdır ki, düşəmən hücumunun qarşısı sarsıdıcı əks hücumlarla alınsın.
Əgər ermənilər bu dəfə də təxribat törətsələr və biz bu dəfə də onların təxribatlarının qarşısını alsaq, daha dünya bizi qınamayacaq. Çünki biz öz ərazilərimizi terror dəstələrindən azad edirik. Biz ancaq öz işğal ounmuş torpaqlarımızda mübarizə aparsaq, haqq-ədalət həmişə bizim tərəfimizdə olacaq. Və bunu da etmək lazımdır, bəsdir dözdük. Bütün xalq da bunu istəyir, ona görə də dövlət xalqa arxalanıb bu addımı ata bilər. Ancaq bir daha vurğulayıram ki, güclü ehtiyyat qüvvələri hazırlanmalıdır. Güclü modulyasiya işləri aparılmasa, nəticələri çox pi sola bilər”.
Xəbərdən istifadə edərkən istinad etmək vacibdir.
