Bu dəfə layihədə Bakı Şəhəri İcra Hakimiyyətinin başçısı Hacıbala Abutalıbovun elmi fəaliyyətindən bəhs edəcəyik. Hakim Yeni Azərbaycan Partiyası İdarə Heyətinin üzvü Hacıbala Abutalıbov 2001-ci ildən paytaxtın icra başçısı postunu tutur.

Türkmənistandan “Bakı Dövlət”ə

Abutalıbov Hacıbala İbrahim oğlu 1944-cü il mayın 13-də Türkmənistanın Krasnovodsk şəhərində anadan olub. 1965-ci ildə Azərbaycan Dövlət Universitetinin fizika-riyaziyyat fakültəsini bitirib. 1968-ci ildə keçmiş SSRİ-nin Leninqrad şəhərində A. İoffe adına Fizika-Texnika İnstitutunda aspiranturaya daxil olub. SSRİ Elmlər Akademiyasının müxbir üzvü, Lenin mükafatı laureatı Yevgeni Qrossun və Marina Bellenin rəhbərliyi altında 1976-cı ildə namizədlik dissertasiyasını müdafiə edib. 1987-ci ildə isə Lenin mükafatı laureatı akademik Aleksandr Kaplyanskinin rəhbərliyi ilə həmin institutda fizika-riyaziyyat elmləri doktoru yüksək elmi dərəcəsi adını alıb.

Elmi ixtiraların müəllifi olan başçı

Rəsmi tərcümeyi-halında qeyd edilir ki, fizika-riyaziyyat elmləri doktoru, professor Hacıbala Abutalıbovun  Amerika, İngiltərə, Fransa, Almaniya, Rusiya və sair dövlətlərin qabaqcıl elmi jurnallarında  200-dən artıq elmi məqaləsi çap olunub. Bundan başqa, onun həm də, 30-dan çox elmi ixtiranın müəllifi olduğu vurğulanır. 
Bildirilir ki, H. Abutalıbovun rəhbərliyi altında 10-dan çox elmlər doktoru və elmlər namizədi yetişib. O, 1988-ci ildən Azərbaycan Milli Elmlər Akademiyasının Fizika İnstitutunda "Yarımkeçiricilərin kvant elektronikası" laboratoriyasının müdiridir. Yüksən dövlət postu tutmasına baxmayaraq, cənab Abutalıbov bu gün də həmin laboratoriyanın müdiridir. Bununla yanaşı, Fizika İnstitutunun yarımştat əməkdaşıdır.

“O, səhərə qədər işləyirdi”

1988-ci ildə Fizika İnstitutunda elmi fəaliyyətə başlayan Hacıbala müəllimin həyat axarı sonradan dəyişir. Belə ki, 1995-ci ilin fevral ayından Hacıbala Abutalıbov dövlət strukturlarında işləməyə başlayır.  Daim gərgin iş qrafikində işləyən kadr çox keçmir ki, bu zəhmətsevərliyinə görə daha yüksək postlara layiq görülür. Suraxanı Rayon İcra Hakimiyyətinin başçısı olduğu zaman mərhum eks-prezident Heydər Əliyev onun işini çox yaxşı qiymətləndirir. Beləcə, 2001-ci ildən etibarən Hacıbala Abutalıbov Bakı şəhərinin meri vəzifəsini icra etməyə başlayır. 

H.Abutalıbovun Moskvada aspirant yoldaşı olmuş akademik Nizami Süleymanov onun elm xadimi kimi çalışqanlığını bu cür qeyd edib: “Bir neçə il Fizika İnstitutunda birgə çalışmışıq. Mən özüm də Moskvada aspirantura təhsili almışam, elmlər namizədliyi və doktorluq elmi dərəcələrini də orda yiyələnmişəm. Yəni ordakı alimlərin işi ilə burdakı alimlərin iş fərqini görmüşəm. Azərbaycanda isə bütün alim korpusunun içərisində laborantından tutmuş akademikinə qədər yalnız bir adamda Moskvada gördüyüm iş stilini görmüşəm, o da Fizika İnstitutunda Hacıbala müəllim olub. Mən də adətim üzrə işdən çox gec çıxardım. Fizika İnstitutunun nəzdində “Tellur” xüsusi konstruktor bürosu vardı, bizim metalşünaslıq bürosu da orda yerləşirdi. Gecədən xeyli keçmiş işdən çıxıb gedəndə baxırdıq ki, bir otaqda işıq yanır. Gözətçidən soruşurdum ki, bu işıq kimindir? Deyirdi ki, bu, Hacıbala müəllimin laboratoriyasının işığıdır. Bir-iki dəfə də maraqlanıb yanına qalxmışdım ki, bu vaxt nə işlə məşğuldur. Deyirdi ki, bu hələ harasıdı? Səhərədək işlədiyim vaxtlar olub. Yəni onun zəhmətkeşliyini o dövrdə görmüşəm“.

Uğursuz cəhdlər

Elmdən 1995-ci ildən ayrılan professor Hacıbala Abutalıbovun nə zamansa elm aləminə qayıdıb qayıtmayacağını demək çətindir. Əslində o, bəlkə də elmdən heç ayrılmayıb. Bəlkə də quruculuq işləri ilə yanaşı, elmi məqalələr də yazır. Bunları demək çətindir. Amma hər halda laboratoriya müdiri kimi qalması onun elmi tam olaraq atmasına imkan yaratmır. Həm də bu günün özündə də H.Abutalıbovun yetirmələri olan elmi kadrlar akademiya və digər yerlərdə çalışmaqdadır. 

Modern.az əməkdaşı Bakı merinin elmi kadrlarını tanıtmağa cəhd edib. Çox təəssüf ki, Fizika İnstitutundan hazır siyahını belə, almaq mümkün olmayıb. Araşdırma cəhdi uğursuz nəticələnsə də, Abutalıbovun yetirmələrinin elmdə bu gün də varlığı danılmazdır. Onların elmə xidməti dolayısı yolla Hacıbala Abutalıbovun da elmi fəaliyyəti hesab olunmalıdır.