"Azərbaycan Milli Məclisi deputatının etik davranış qaydaları haqqında” qanun layihəsi Milli Məclisin Hüquq siyasəti və dövlət quruculuğu və İnsan hüquqları komitəsinin bu gün keçirilən birgə iclasında müzakirəyə çıxarılıb.
Xeberle.com-un "Report”a istinadən məlumatına görə, Milli Məclis sədrinin müavini, İnsan hüquqları komitəsinin sədri Bahar Muradova deyib ki, parlament seçkisi zamanı deputata 40 mindən çox seçici səs verir. 
O qeyd edib ki, seçicilər səs verən zaman deputata inanırlar və bu parametrlər üzrə ondan lazımi iş görməsini gözləyirlər. 
B.Muradova deyib ki, bəzi hallarda deputatlar tərəfindən addekvat olmayan davranış sərgilənə bilir: "Təbii ki, bu da qanunla tənzimlənməlidir. Ona görə də yeni hazırlanan qanun layihəsinin əsas məqsədi şəffaflığın və səmərəliliyin artırılmasıdır. Layihə hazırlanarkən Avropa Şurasına və MDB ölkələrinin təcrübələri, eləcə də Azərbaycan reallıqları nəzərə alınıb”.
Deputat Azay Quliyev vurğulayıb ki, belə bir qanun layihəsinin hazırlanmasına ciddi ehtiyac vardı: "Layihədə yer alan müddəalarda qeyri-adi heç nə yoxdur. Konstitusiyaya əsasən, bunu ümumi cəmləşdirib yekun halda təqdim etmək lazım idi. Hakim partiyaların, müstəqil və müxalifət partiyalarının deputatları ilə ayrılıqda görüşüb işçi qrupu da yarada bilərik”.
Hazırda qanun layihəsi ətrafında müzakirələr davam edir. 

Xəbərdən istifadə edərkən istinad etmək vacibdir.