Bu gün Milli Məclisin Ailə, qadın və uşaq məsələləri komitəsinin iclası keçirilib.
 Xeberle.com-un Modern.az-a istinadən xəbərinə görə, iclasda "Uşaq hüquqları haqqında” qanununa dəyişiklik müzakirəyə çıxarılıb.
 Komitə sədri Aqiyə Naxçıvanlı bildirib ki, bir zamanlar orta məktəblərin yaxınlığında reklamlar yerləşdilirdi.
 "Dəftər və qələmlərin üzərində də reklamlar əks olunurdu. Hətta cizgi filmləri nümayiş olunarkən fasilələrlə reklamlar verilirdi. Bunların hamısına qadağa qoyuldu”.
O bildirib ki, hazırda bu sahədə çox ciddi nəzarət var.
Deputat Dilarə Cəbrayılova deyib ki, dərs vəsaitlərində reklamların olması uşaqları dərsdən yayındırır:
 "Bu cür reklamlara qadağa qoyulsa da, hələ də bu cür hallar baş verir. Bu da bizi narahat etməyə bilməz. Məktəb ətrafında reklamların yığışdırılması doğru qərardır. Bu, uşaqların müdafiəsi baxımından çox önəmlidir”.
Deputat Astan Şahverdiyev bildirib ki, uşaqlara nifrət aşılana bilməz. Deputat şagirdlərin məktəblərdə müəllimləri tərəfindən döyülməsinə də toxunub:
 "Bəzən görürük ki, hansısa şagird müəllimi tərəfindən döyülüb. Bu cür hallar yolverilməzdir. Düzdür, cəza tədbirləri görülür. Amma hər uşaq, valideyn şikayət edə bilmir axı. Ona görə də uşaqları qorumaq lazımdır”.
 Deputat Tahir Rzayev isə  ictimai nəqliyyat vasitələrində yerləşdirilən reklamlardan şikayətlənib: "Avtobusdakı reklama nəzarət etmək lazımdır. Bəzən elə açıq-saçıq reklamlar yerləşdirirlər. Həmin uşaqlar da o avtobusdan istifadə etdiyinə görə onlara zərərlidir”.
Qanun layihəsinin müzakirəsi davam etdirilib.

Xəbərdən istifadə edərkən istinad etmək vacibdir.