Modern.az saytının “Siyasilərin elmi fəaliyyəti” rubrikasında növbə son günlərin ən çox müzakirə olunan və gündəmdən düşməyən siması eks-deputat, yenicə azadlığa çıxan Gülər Əhmədovadır.

Gülər Mikayıl qızı Əhmədova Azərbaycan Dövlət Pedaqoji İnstitutunun riyaziyyat fakültəsini fərqlənmə diplomu ilə bitirib. Psixologiya elmləri namizədidir. 1986-cı ildən Bakıda texniki peşə məktəbində müəllim, orta məktəbdə müəllim, direktor müavini vəzifələrində çalışıb. 1994-cü ildən Azərbaycan Respublikası Gənclər və İdman Nazirliyinin baş təlimatçısı, şöbə müdiri, idarə rəisi, 1996–2000-ci illərdə Azərbaycan Respublikası Uşaq Təşkilatının sədri olub. Həbsə qədər Bakı Dövlət Universitetinin müəllimi olub.

Bakı Dövlət Universitetinin sosial elmlər və psixologiya fakültəsinin psixologiya kafedrasında işləmiş eks-deputatın dissertasiya mövzusunu müəyyən səbəblərdən öyrənə bilmədik. Amma əsası 1997-ci ildə qoyulan, Əbdül Əlizadə, Əkbər Bayramov, Nadir İsmayılov kimi professorların çalışdığı, hazırda Akademiyanın müxbir üzvi, millət vəkili Bəxtiyar Əliyevin müdiri olduğu kafedra həmişə güclü psixoloqları öz ağuşuna alıb. Gülər Əhmədova da kafedranın formalaşmış ənənəsinə uyaraq sosial psixologiya, diplomatik psixologiya sahəsində nə isə etməyə çalışıb. Sonra isə məlum hadisələr baş verib.

Məhkəmə çəkişmələri, bir ildən çox həbsxana həyatından sonra isə elmə “prestij” qaynağı kimi baxan Gülər Əhmədovanın yenidən universitetə bərpa olunub-olunmayacağı hələ məlum deyil. Adıçəkilən kafedranın müdiri Bəxtiyar Əliyev bu suala belə cavab verir: “Bu məsələni Gülər Əhmədova və universitet həll edəcək. Bizim səlahiyyətimizdə olan məsələ deyil”.