Modern.az saytı“Siyasilərin elmi fəaliyyəti” rubrikasında növbəti yazını təqdim edir. Bu dəfə Müsavat Partiyasının üzvü, tanınmış həkim Adil Qeybullanın elmi fəaliyyətindən danışılacaq:

Müsavat Partiyasının fəallarından olan Adil Qeybulla bizlərə daha çox siyasi fəaliyyəti ilə tanışdır. Amma Adil Qeybullanı yaxından tanıyanlar onu çox mütaliəli bir insan və güclü həkim kimi xarakterizə edirlər. Onlar üçün Adil Qeybullanın  siyasi fəaliyyəti daha çox ikinci planda qalan bir məsələdir.

1962-ci ildə Şəkinin Kiş kəndində anadan olan A.Qeybulla 1968-ci ildə elə bu kəndin orta məktəbinə yollanır.  Orta məktəbi çox yüksək qiymətlərlə oxuyan A.Qeybulla onuncu sinfi qızıl medalla bitirir. Elə həmin il, yəni 1978-ci ildə Azərbaycan Tibb İnstitutuna daxil olur. O vaxtı tələbələr üçün ən yaxşı təqaüd sayılan Lenin təqaüdünə sahiblənir. Ali məktəbi bitirəndən sonra tibb  təhsilini Moskvada – Rusiya Tibb  Elmlər Akademiyasının onkoloji elmi mərkəzinin doktoranturasını bitirir. Daha sonra isə Sankt-Peterburqda diplomdan sonrakı akademiyada estetik plastik cərrahiyə kursunu bitirib.

Adil Qeybulla Azərbaycan tibb elmi tarixində ən gənc professor olan alimlərimizdəndir . Belə ki, o 29 yaşında tibb elmləri doktoru, 30 yaşında isə professor adına layiq görülür. Sonradan aktiv siyasi fəaliyyətə qoşulan Adil Qeybulla elmdən bir xeyli məsafədə uzaqlaşmış olur. 

Milli Azadlıq  Hərəkatının fəallarından olan A.Qeybulla Elçibəy hakimiyyətinin süqutundan sonra siyasi fəaliyyətini Müsavat Partiyasında davam etdirir. 

Adil Qeybulla öz elmi fəaliyyəti barədə bunları danışır:

“Bağırsaqların əməliyyatından sonrakı fəaliyyəti ilə bağlı müalicə növü üzrə namizədlik dissertasiyasını müdafiə etmişəm. Eyni zamanda “Qida borusu xərçəngi üzrə doktorluq dissertasiyası” hazırlamışam. Bugünkü işim əsasən  praktiki fəaliyyətlə bağlıdır. Ancaq elmi fəaliyyətlə də məşğul oluram. İşlərimizi ümumiləşdiririk. Məqalələr, kitablar  yazıram. Mən bütün potensialımı reallaşdırma imkanından məhrumam. Ancaq yenə də imkan daxilində bu işlərdən geri qalmamağa çalışıram. Elmi dərəcəmə gəldikdə isə tibb elmləri doktoru və professoram”.