AŞPA-da çıxış edən prezident İlham Əliyev Avropa parlamentinin deputatlarının suallarını cavablandırıb.Modern.az bildirir ki, dövlət başçısı ölkədə müxalifətin fəaliyyətinin məhdudlaşdırılması barədə deyilənləri rədd edib.

Biz müxalifətin fəaliyyətini necə məhdudlaşdıra bilərik? 

“Bizdə heç bir senzura yoxdur. Biz necə məhdudlaşdıra bilərik? Əgər kimsə mitinqlər keçirirsə, onlara heç bir əngəl törədilmir. Müxalifətin sonuncu mitinqində cəmi 800 adam gəlmişdi. Müxalifətin olması normaldır. Cəmiyyət bizi dəstəkləyir. Müxalifət barədə sual verirsiniz. Onlar  92-ci ildə hakimiyyətdə olublar. Onlar bu xaosu yaradıblar. Sonra hakimiyyətdən gediblər. Burda oturan o gənclər ola bilsin o tarixi bilmirlər”.

“Leyla Yunus ifadə verməkdən imtina edib”

İ. Əliyev hüquq müdafiəçisi Leyla Yunusla bağlı ünvanlanan sualın cavabında bildirib ki, hüquq mühafizə orqanları cinayət işinin araşdırılması baxımından Leyla Yunusu ifadə verməyə dəvət ediblər. O isə bundan imtina edib.

“Erməni hərbi qüvvələri orada nə edir?”

Təmas xəttində atəşkəsin pozulması barədə verilən sualı cavablandıran İ.Əliyev bildirib ki, Azərbaycan torpaqları işğal altında saxlanılır. “Təmas xəttində atəşkəsin pozulmasına gəlincə, işğalçı ordunu ordan çıxarmaq lazımdır. Erməni hərbi qüvvələri orada nə edir?-deyə sual edib.

Ermənistan hökumətinin yürütdüyü siyasətin öz xalqına problem yaratdığını deyən, prezident qeyd edib ki, bu siyasətin nəticəsində erməni vətəndaşları öz ölkələrini həmişəlik tərk edirlər.  “Onlar başa düməlidir ki, bu siyasətin axırı yoxdur”-deyə İ.Əliyev vurğulayıb.  

“Həbsxanada jurnalist yoxdur”

Azərbaycanda jurnalistlərin həbs olunması barədə sualı cavablandıran İ. Əliyev bu ittihamı rədd edib və bu sualı ünvanlayan Avropalı deputatı “yalan danışmaqda” ittiham edib.

”Siz yalan deyirsiniz. Jurnalistləri heç kim məhkum etməyib. 2009-dan bəri heç bir jurnalist diffamasiyaya görə həbsə düşməyib”.

“Niyə indi siz burda yalan danışırsınız?”

Dövlət başçısı 2013-cü ildə keçirilən seçkilərin nəticələrinin mübahisələndirilməsi barədə sual verən digər avropalı deputata isə AŞPA-nın və digər beynəlxalq qurumların hesabatlarını xatırladıb. “Seçki nəticələri ilə bağlı beynəlxalq rəylər var. Onların hamısının seçkilərin şəffaf və ədalətli keçirildiyi barədə  rəsmi açıqlamaları olub. Niyə indi siz burda yalan danışırsınız?”

İ. Əliyev daha sonra Avropa enerji layihələri ilə bağlı və digər sualları cavablandırıb.