Dünən axşam saatlarında ölkə.az-a Ağdam rayonundan verilən xəbərdə bildirilir ki, rayonun Çıraqlı kəndindən 2 km məsafədə yerləşən Bayramlar kəndi ermənilərdən azad edilib. Saytın Qarabağa ezam olunmuş müxbirinin verdiyi məlumata görə, hazırda Azərbaycan Silahlı Qüvvələrinə aid döyüş helikopterləri həmin kəndin üzərində rahatlıqla uçurlar. Düşmən tərəfin müqavimətinin tam sındırıldığı bildirilir. Əldə olunan kəşfiyyat məlumatlarına görə, erməni əsgərləri işğal olunmuş ərazilərimizdəki postları bir-birinin ardınca tərk edərək qaçırlar. Qeyd edək ki, Müdafiə Nazirliyinin mətbuat şöbəsinin müdiri Vaqif Dərgahlı ilə bu xəbərlə bağlı əlaqə saxlanıb, o, xəbəri nə təsdiq, nə də təkzib edib.

Ardınca Ağdamın Yusifcanlı kəndi də ordumuz tərəfindən işğaldan azad edilib. Belə ki, ölke.az-ın cəbhə bölgəsinə ezam olunan muxbiri bildirir ki, əvvəllər ermənilərin nəzarətində olan Yusifcanlı kəndinin yaxınlığındakı bizə məxsus mövqe və gözətçi postu ərazidə növbə çəkən əsgərlərimizin irəliləməsi nəticəsində boşalıb. Hadisəni yerində araşdırmaq üçün əraziyə yollanan müxbir yayılan xəbərin doğru olduğunu görüb. Əvvəllər ermənilərin intensiv atəşi altında olan əraziyə sanki sükut çöküb.

Ordumuzun əsgərlərinin köhnə postdan Yusifcanlıya doğru yerləşən daha iki erməni postunu ələ keçirdiyi və Yusifcanlını azad etdiyi bildirilir. Yusifcanlıya bir neçə yüz metr qalmış ordumuzun əsgərləri müxbiri daha irəli buraxmayıblar. Hərbi sirri yaymamaq məqsədi ilə əsgərlərimizin görüntüsünü sayta yerləşdirmirik.

Müxbirin Yusifcanlıdan hazırladığı fotoreportajda tam olaraq ermənilərin nəzarətində yerləşən Qarqarçayın qurumuş yatağı artıq tam olaraq bizim nəzarətimizdədir. Müxbir həmin görüntüləri Qarqarçayı rahat surətdə keçərək çəkib.