Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə Azərbaycan Demokratik Tələbə Gənclər Təşkilatının (ADTGT) icra etdiyi "Ermənistan – Azərbaycan Dağlıq Qarabağ münaqişəsi və həqiqətləri barədə beynəlxalq ictimaiyyətə yönələn çağırışlar” adlı beynəlxalq informasiya və ictimai dəstək xarakterli layihə çərçivəsində Belçikanın Brüssel şəhərində parlament üzvlərinin, hökumət strukturları, QHT və media təmsilçilərinin iştirakı ilə beynəlxalq konfrans keçirilmişdir.
"Dağlıq Qarabağ münaqişəsi və Azərbaycan həqiqətləri” adlı konfransı ADTGT-nin beynəlxalq tərəfdaşı olan Belçika Türk Dərnəkləri Birliyinin (bu federativ quruma Belçikada fəaliyyət göstərən 100-dən artıq QHT və digər ictimai qurum və dərnək daxildir) prezidenti Hikmət Çakır açdı və konfransın keçirilməsi məqsəd və əhəmiyyətindən danışdı.
Sonra ADTGT sədri Asif Əsgərli "Dağlıq Qarabağ münaqişəsi və Azərbaycan həqiqətləri” mövzusunda geniş təqdimatlı məruzə ilə çıxış etdi. QHT rəhbəri Ermənistan-Azərbaycan Dağlıq Qarabağ münaqişəsi, münaqişənin real vəziyyəti, həqiqətləri, işğal və həll yolları haqda ətraflı məlumat verdi və ölkəmizin ədaləti mövqeyinin dəstəklənməsini konfrans iştirakçılarından xahiş etdi.
Növbəti "Azərbaycan müasir Avropanın bir hissəsi kimi” adlı məruzə ilə ADTGT sədr müavini Gülnarə Bağırova çıxış etdi. O, nitqində Azərbaycanın modern, sülhpərvər siyasətini və Avropaya inteqrasiya mövqeyini bir daha qonaqların diqqətinə çatdırdı və qoca qitənin ölkəmizə diqqətinin daha da artırılmalı olduğunu vurğuladı.
Sonra konfrans iştirakçısı olan əcənəbi qonaqlar, Belçika Federal Parlamentinin üzvləri, QHT rəhbərləri və media təmsilçiləri çıxışlar edərək, Dağlıq Qarabağ münaqişəsi, Azərbaycanın obyektiv mövqeyi və ədaləti siyasəti haqda fikirlərini bildirdilər və bu ölkəyə Avropada dəstəyin zəruriliyi və onun imkanları barədə rəyləri çatdırdılar.
Konfrans iştirakçıları Azərbaycan və Ermənistan ictimai fəalları və QHT rəhbərləri tərəfindən qurulan "Ermənistan və Azərbaycan arasında Sülh naminə Platforma”nı alqışladılar və bu platformaya beynəlxalq ictimai-siyasi və mədəni-humanitar dəstəyin vacibliyini qeyd etdilər.
ADTGT İctimai əlaqələr
və informasiya departamenti
Xəbərdən istifadə edərkən istinad etmək vacibdir.
