Azərbaycanın Avronest PA-dakı nümayəndə heyətinin rəhbəri Fuad Muradov Ermənistanın Füzuli rayonunun Alxanlı kəndində törətdiyi vandalizm aktı ilə bağlı ölkəmizdə, eyni zamanda, dünyada fəaliyyət göstərən bütün gənclər təşkilatlarına müraciət edib.
Mürüciətdə bildirilib ki, ermənilərin Füzulidə dinc sakinləri - 1967-ci il təvəllüdlü Sahibə Quliyeva və onun 2 yaşlı nəvəsi Zəhra Quliyevanı qətl etməsi barədə təfərrüatları Avropa Parlamentində fəaliyyət göstərən deputatlara çatdırmaq lazımdır.
Bəs gənclər təşkilatları bu müraciətə necə reaksiya verdilər?
Modern.az məsələ ilə bağlı bir neçə gənclər təşkilatı ilə əlaqə saxlayıb,
"İrəli” İctimai Birliyinin sədri Mirhəsən Seyidov:
" 2 yaşlı Zəhranın ermənilər tərəfindən qətl edilməsi, ümumiyyətlə, Alxanlı kəndində baş verən hadisələr bir daha sübut edir ki, erməni təcavüzü davam edir. Tarix səhifələrinə diqqət etdiyimizdə görürürük ki, 1992-ci il Xocalı törədilmiş qətliam tendensiyası 2017-ci ildə də təkrarlanır. Bu, onu göstərir ki, Ermənistanın Azərbaycana qarşı işğalçılıq siyasəti dəyişməyib. Millət vəkili Fuad Muradov vacib təşəbbüs göstərib. Artıq Azərbaycanda fəaliyyət göstərən gənclər təşkilatları müxtəlif bəyanatlarla çıxış ediblər.
Biz "İrəli” İctmai Birliyi olaraq avropalı deputatların, rəsmilərin elektron adreslərinə 7 dildə tərcümə olunmuş bəyanatlar göndərmişik. Ermənilərin Azərbaycana qarşı təcavüzünü dünyaya çatdırmaq üçün əlimizdən gələni edəcəyik. Ümid edirik ki, dünya ictimaiyyəti bununla bağlı doğru qərar verəcək. Gənclər istəyir ki, dünya uşağı, dünya insanı ölməsin, hər zaman sülh bərqərar olsun. Bu gün Azərbaycanda yetişən gənclik Azərbaycana qarşı olan fikirlərin, atılan addımların tən ortasındadır və hamısını çox yaxşı şəkildə dərk edir”.
Qaçqın və Məcburi Köçkün Gənclər Təşkilatının sədri Vüqar Qədirov:
"Biz bu məsələ ilə bağlı bəyanatlarımızı artıq avropalı parlamentarilərə, ATƏT-in Minsk Qrupuna həmsədrlik edən dövlətlərin Azərbaycandakı səfirliklərinə və onların xarici işlər nazirliklərinin e-mail adreslərinə göndərmişik. Çox təssüflər olsun ki, bu illər ərzində ATƏT-in Minsk Qrupuna həmsədrlik edən dövlətlər, istər Avropa parlamentariləri, istər digər xarici diplomatlar olsun, Azərbaycana qarşı qərəzli münasibətləri hələ də davam etdirirlər”.
Tələbə Gənclər Təşkilatının sədri Cavidan Abdullayev:
"Hazırda bizim bu yöndə işlərimiz davam edir. Bəyanatlarımızı ingilis, rus, fransız və başqa dillərə tərcümə edirik. Günün sonuna qədər bütün məlumatları avropalı parlamentarə və xarici mətbuata göndərəcəyik. Ermənilərin Füzulinin Alxanlı kəndində törətdikləri vəhşiliyi dünya ictimaiyyətinə çatdırmaq üçün gənclər olaraq əlimizdən gələnləri edəcəyik”.
Azərbaycan Demokratik Tələbə və Gənclər Təşkilatının sədri Asif Əsgərli:
"Milli Məclisin Gənclər və idman komitəsinin sədri Fuad Muradovun müraciətini dəyərləndirimişik. Dünən axşamdan bu yöndə addımlar atmışıq. Yalnız Avropa ölkələrinin deyil, bir çox ölkələrin deputatlarına, ölkə rəsmilərinə Füzulinin Alxanlı kəndində 2 yaşı Zəhranın və onun nənəsinin qətli ilə bağlı bəyanatlar göndərmişik. Bizim bəyanatımız ingilis, rus və fransız dillərinə tərcümə olunub”.
Xəbərdən istifadə edərkən istinad etmək vacibdir.
