Müdafiə Nazirliyinin nümayəndələri, müharibə veteranları, bir qrup QHT və media nümayəndələri cəbhə xəttində xidmət edən əsgərlərlə görüşüb. ANS PRESS-in bölgə müxbirinin verdiyi məlumata görə, öncə hərbi hissədə əsgərlərin qarşısında çıxışlar edilib. Çıxışlar zamanı xalqla ordunun həmrəyliyi xüsusi vurğulanıb.

Daha sonra nümayəndə heyyəti birbaşa səngərə yollanıb. Komandirlər səngərdəki xidmət barədə nümayəndə heyyətinə məlumat verib. Ön xəttə hərbiçilərimizin xidmət şəraitini gözlərilə görən keçmiş döyüşçülər də, ordunun bu günkü vəziyyətinin 20 il bundan öncə olduğundan çox fərqləndiyini bildiriblər.

I Qarabağ müharibəsi iştirakçıları onu da əlavə ediblər ki, yarımçıq saxladıqları işi bu gün Ali Baş Komandanın əmrilə sona çatdırmağa hazırdırlar.

“Biz mütləq qalib gələcəyik. İndiki durum çox gözəldir. Bizim vaxtımızda vəziyyət belə deyildi. Deyim ki, bizdə tank vuran da çatışmırdı. İndi isə cürbəcür keyfiyyətli silahlarımız var”, - deyə keçmiş döyüşçü Hafiz Məmmədov bildirib.

Çıxışları zamanı keçmiş döyüşçülər birmənalı olaraq döyüş əmrini gözlədiklərini qeyd ediblər. Onların sözlərinə görə, döyüşçülər arasında böyük ruh yüksəkliyi var.

"Əlli yaşım var. 2 oğul böyütmüşəm. Bu gün oğlanlarım da, özüm də, orduya qatılmağa hazırıq. Əsgərlərə dayaq durmalıyıq və önündə getməliyik. Çox sevindik ki, bu gün ordumuzda byük ruh yüksəkliyi hökm sürür”, - deyə keçmiş döyüşçü Qabil Allahverdiyev bildirib.

Nümayəndə heyyəti əsgərlərimizin sayıqlığını öz gözlərilə görüb. Milli Ordumuzun hərbiçiləri də Ermənistan silahlı birləşmələrinin məğlubiyyətinin uzaq olmadığını dedilər.

“Düşmənin atdıqları hər güllənin cavabını iki qat artıq, layiqincə veririk. Ermənilər gizlətsələr də, onların itkiləri həddindən artıq çox olur. Gizlətməyə çalışırlar”, - deyə ordumuzun giziri Elgün Ələkbərov vurğulayıb.

Ön xətdə xidmət edən komandirlər də bir daha əmin ediblər ki, hərbiçilərimiz Milli Ordumuzun balansında olan müasir texnika və silahlar vasitəsiylə qarşı tərəfin hər addımını izləmək gücünə malikdir. Lazım gəldiyi anda düşmən qüvvələri məhv etmək qüdrətinə malikdir.