“Rusiya, Azərbaycan və Ermənistan prezidentlərinin Soçi görüşü onu deməyə əsas verir ki, tərəflər münaqişənin həllini hazırkı format daxilində - ATƏT-in Minsk Qrupu vasitəsi ilə çözməyə üstünlük verirlər”.

Axar.az xəbər verir ki, bu sözləri “Novosti Armeniya”ya açıqlamasında Müstəqil Dövlətlər Birliyi (MDB) İnstitutunun Ermənistan filialının direktoru, politoloq Aleksandr Markarov dövlət  başçılarının görüşünü şərh edərkən deyib.

Onun sözlərinə görə, bu görüşün təşkili Ukrayna hadisələrində beynəlxalq nüfuzunu itirmiş Rusiyaya lazım idi və Moskva özünü vasitəçi rolunda təqdim etməyi bacardı:

“Tərəflər bir daha münaqişənin sülh yolu ilə həllinə önəm verdilər. Təmas xəttində baş verən hadisələr bu variantı şərtləndirdi. Tərəflərin militarist mövqeləri münaqişənin həllində qeyri-effektiv rol oynadı”.

Markarov Prezident İlham Əliyevin Birləşmiş Millətlər Təşkilatının Təhlükəsizlik Şurasının məlum qətnamələrinin Ermənistan tərəfindən icra olumaması iradına da toxunub:

“Azərbaycanın özü 822 saylı qətnamənin tələblərinə əməl etmir, reaksiya vermir və hərbi təsirini genişləndirir. Təbii ki, bu cür yanaşma da 20 ildən sonra belə, münaqişənin həllinə mənfi təsir göstərir”.

Xatırladaq ki, Ermənistan dövlət başçısı Serj Sərkisyan da Soçidə BMT-nin 4 məlum qətnaməsini Azərbaycanın icra etməməsindən Putinə şikayətləndi. Halbuki həmin qətnamələr Ermənistanın işğal etdiyi ərazilərdən qeyd-şərtsiz və heç bir tələb irəli sürmədən çıxmasını tələb edir. Bu qətnamələrdəki yalnız bir maddə - tərəflərin silahlanmamasını Ermənistan qətnamələrin Azərbaycan tərəfindən pozulması kimi dəyərləndirir.