“Avqustun 11-də Azərbaycan Müdafiə Nazirliyi ilə Xarici İşlər Nazirliyi birgə ən sərt formada bu fakta görə BQXK-nin Baş ofisinə etirazını bildirməli və tələb etməlidir ki, baş verənlərlə bağlı onlar Azərbaycan tərəfinə açıqlama versinlər”.
Axar.az xəbər verir ki, bu açıqlama ilə Üzeyir Cəfərov öz Feysbuk səhifəsində çıxış edib. O, beynəlxalq qurumların öz fəaliyyətlərini doğru həyata keçirmədiyini bildirib:
“Heç kimə artıq sirr deyil ki, ölkəmizdə akkreditə olunmuş bir sıra beynəlxalq qurumların istər Azərbaycandakı, istərsə də Ermənistandakı nümayəndəliyi sadəcə vaxtlarını keçirtməklə, baş girələməklə məşğuldur. İstər ATƏT adında bir bivec qurum olsun, istərsə də onun heç bir əməli işə yaramayan və 20 il ərzində işğalçı ilə işğala məruz qalan dövlət arasında fərq qoymağı bacarmayan Minsk Qrupu adlı qurumu olsun. Azdan-çoxdan insanların bir az inandıqları, ekstremal vəziyyətdə güvənmək istədikləri bir qurum var idisə, bu da Beynəlxalq Qızıl Xaç Komitəsinin (BQXK) həm ölkəmizdəki, həm də Ermənistandakı nümayəndəliyi idi ki, onlar da son vaxtlar, bir qədər yumşaq desək, “yolu azıblar”. Mən bu haqda bir neçə dəfə fikrimi həm yazılı, həm də şifahi olaraq səsləndirmişəm. İndi isə görürəm ki, çox böyük köməyə ehtiyac yaranıb və biz bir dövlət və ictimaiyyət olaraq bunlara ən sərt formada təpki göstərməliyik. Bunlar deyəsən öz mandatlarının mahiyyətini unudublar və nə etməli, necə etməli olduqlarını yalnız Ermənistana sərf edən formada həyata keçirməyə cəhd göstərirlər”.
Hərbi ekspert Qırmızı Xaç Komitəsinin Azərbaycandan atəşkəsin pozulmaması ilə bağlı zəmanət istəməsini biabırçı addım olduğunu söyləyib:
“Bir neçə faktla fikrimi əsaslandırmağa çalışacağam. İyulun sonunda 3 azərbaycanlımız əzəli torpaqlarımız olan Kəlbəcər rayonu ərazisində erməni silahlı birləşmələri tərəfindən girov götürüldü və onların ikisi - Sahbaz Quliyev və Dilqəm Əsgərov sag, biri isə - Həsən Həsənov öldürülmüş vəziyyətdə ermənilərin əlinə keçdi. Biz 3 həftəyə yaxın aləmə car çəkdikdən və Baş nazirin müavini, Qaçqın və Məcburi Köçkünlərin işləri üzrə Dövlət Komitəsinin sədri Əli Həsənov BQXK-nın Bakı ofisinin rəhbərliyini sərt xəbərdarlıq etdikldən sonra bunlar hıqqana-hıqqana hərəkətə keçməyə başladılar. Çox böyük müsibətlərdən və rüsvayçılıqdan sonra nəhayət ki, girovlarımızla görüşdülər və onlardan 2-3 cümləlik xəbəri məktub şəkilində doğmalarına çatdırdılar. Baxın, artıq yenə xeyli müddətdir ki, soydaşlarımızdan xəbər-ətər yoxdur. Özü də bu yaramaz erməni diversantı Karen Petrosyanla bağlı yaşanan xoşagəlməz olaydan sonra bizim hamımız çox narahatıq ki, Ermənistan tərəfi girov vətəndaşlarımıza qarşı insanlıqdan kənar addım ata bilər. Əvəzində isə görün nə görürük: BQXK-nın əməkdaşları Ermənistan-Azərbaycan dövlət sərhəddi yaxınlığındakı erməni yaşayış məntəqələrində humanitar tədbirlərin görülməsi zamanı atəşkəsin pozulmayacağı barədə zəmanət verilməsi ilə əlaqədar Azərbaycan tərəfinə xahişlə müraciət ediblər”.
Üzeyir Cəfərov Ermənistanın BQXK üçün yaradılmış şəraitdən istifadə etdiyini deyib:
“Həmişəki kimi, Azərbaycan tərəfi də beynəlxalq hüquq normalarına və hümanitar qaydalara riayət etmək şərtilə bu işlərin görülməsi məqsədilə BQXK-nin əməkdaşlarına şərait yaradıblar. Və baxın görün bu yaramazlar bizim ürəyiyumşağlığımızdan necə istifadə ediblər. Ermənistan tərəfi BQXK-nin Ermənistandakı nümayəndəliyinin əməkdaşlarının burada fəaliyyətinin təmin edilməsi məqsədilə yaradılmış şəraitdən sui-istifadə etməklə öz çirkin niyyətlərini həyata keçirmişlər. Erməni tərəfi traktor və digər mülki texniki vasitələrdən istifadə etməklə zirehli döyüş texnikasının yerdəyişməsini həyata keçirərək Ermənistanın Movses yaşayış məntəqəsi yaxınlığında əlverişli mövqe əldə etməyə cəhd göstəriblər. Bundan sonra Ermənistan Silahlı Qüvvələrinin bölmələri Tovuz rayonunun Əlibəyli və Ağdam yaşayış məntəqələrini intensiv atəş altında saxlamağa nail olublar. Və bizim tərəfin üzüyumşaqlığı elə bizim özümüz üçün ağır nəticələrə səbəb olub. Xatırlayırsınızsa, iyulun 25-də ermənilərin atəşkəsi pozması nəticəsində Tovuz rayonunun Əlibəyli kəndinin iki dinc sakini yaralanmışdı və onlardan birinin vəziyyəti ağır olduğundan onun sağ qalıb-qalmayacağı hələ də sual altındadır”.
O, Müdafiə Nazirliyinin son hadisələrlə bağlı BQXK-ya ən sərt formada münasibət bildirəcəyinə ümidvar olduğunu vurğulayıb:
“Baş verənlərə görə mən məsuliyyəti bütövlükdə BQXK-nin rəhbərliyində görsəm də, bizim Müdafiə Nazirliyi də belə şəraitə imkan verməməlidir. Elə bunun nəticəsidir ki, bizim bir əsgərimiz yenə bu axşam düşmənlərin o istiqamətdən atdıqları xaincəsinə atəş nəticəsində şəhid olub. Avqustun 11-də Azərbaycan Müdafiə Nazirliyi ilə Xarici İşlər Nazirliyi birgə ən sərt formada bu fakta görə BQXK-nin Baş ofisinə etirazını bildirməli və tələb etməlidir ki, baş verənlərlə bağlı onlar Azərbaycan tərəfinə açıqlama versinlər. Əgər bu addım atılmazsa, şəxsən öz tərəfimdən, Azərbaycanı qəlbən sevən şəxslərlə birgə yaxın günlərdə BQXK-nın Bakı ofisinin rəhbəri ilə görüş tələb edəcəm, əks təqdirdə onların Bakıdan çıxarılması üçün aksiyalara başlayacağıq. Yetər artıq bizim heysiyyatımızla oynamaqları!. Yetər artıq bizə yuxarıdan aşağı baxmaqları! Yetər artıq bizi boş və mənasız vədlərlə ələ salmaqları! Düşünürəm ki, mənim bu çağırışıma həm vicdanlı vətəndaşlarımız, mətbuat orqanları, həm də girovluqda olan şəxslərin doğmaları, yaxınları səs verəcəklər”.
