Millət vəkili Qənirə Paşayeva Antakyada "Qərbin Azərbaycana və Türkiyəyə qarşı ikili standartlarına qarşı birgə mübarizə” adlı konfrans keçirib.
"Avropada artan islamafobiyanın doğurduğu ciddi fəsadlar”adlı konfransda geniş məruzə ilə çıxış edən millət vəkili Qərbin türk-müsəlman dünyasına qarşı ikili standartlarını kəskin qınayıb.
"Bu gün BMT başda olmaqla beynəlxalq təşkilatlar bir neçə böyük dövlətin maraqlarının müdafiəsindən başqa heç bir işlə məşğul olmur. Ermənistanın işğal etdiyi Azərbaycan torpaqlarının azad edilməsi ilə bağlı qətnamələr var, amma onların həyata keçirilməsi üçün Ermənistana heç bir təzyiq göstərilmir. İnsan haqlarından danışan beynəlxalq təşkilatlar Ermənistanın işğalçılığı üzündən öz evinə dönə bilməyən 1 milyon azərbaycanlı qaçqın və məcburi köçkünün haqlarının müdafiəsi istiqamətində heç bir addım atmır. 100 il əvvəl tarixdə olmayan soyqırım barədə qərar qəbul edənlərin əksəriyyəti modern dünyanın gözləri qarşısında Ermənistanın Xocalıda törətdiyi dəhşətli soyqırımı görmək istəmir. Eyni vəziyyət Türkiyəyə, türk dünyasına qarşı yanaşmada da özünü göstərir”, - o bildirib.
Avropada islamafobiyanın artmasının doğurduğu ciddi narahatlıqdan danışan millət vəkili bildirib ki, beynəlxalq hüququn tamamilə zəiflədiyi bir dünyada haqlarını qoruya bilmənin tək yolu gücdür:
"Bu güc isə birlikdən keçir. Ona görə də Azərbaycan və Türkiyə olaraq birliyimizi daha da gücləndirməliyik. Bəzi güclər bizi arxadan vura bilmək üçün öz içərimizdə də xainlər yetişdirirlər və bu məsələyə ciddi diqqət yetirilməlidir”.
Azərbaycan dövlətinin icazəsi olmadan Azərbaycanın işğal altında olan torpaqlarına gedib separatçılarla görüşən bəzi Türkiyə vətəndaşlarının addımlarını tənqid edən millət vəkili vurğulayıb ki, onlara qarşı ciddi tədbirlər görülməlidir, çünki onlar iki qardaş ölkə arasında münasibətlərə öz mənfi təsirlərini göstərirlər.(Axar.az)

 

 

Xəbərdən istifadə edərkən istinad etmək vacibdir.