Bu ölkələrin fonunda dünyanın super gücü olan ABŞ isə sanki kölgədə qalıb. Nəzərə alsaq ki, məlum Soçi görüşündən bir gün sonra ABŞ prezidenti Donald Trampla Türkiyə prezidenti Rəcəb Tayyib Ərdoğan arasında telefon danışığı olub.

Ağ ev rəhbəri D.Tramp R.T.Ərdoğana ölkəsinin Yaxın Şərqlə bağlı siyasətinin yanlış olduğunu və ölkəsinin Yaxın Şərqlə bağlı siyasətində müəyyən korrektələr edəcəyinə söz vermişdi. Hətta, Türkiyəni hər zaman rahatsız edən PKK-ın qalığı sayılan YPG və PYD-yə ABŞ tərəfindən silah verilməsinin qarşısını alacağını dilə gətirmişdi.

Maraqlıdır, Amerika Yaxın Şərqdə sıxışdırıldığını və müttəfiqi olan Türkiyəsiz bölgədə heç bir irəliləyişə nail ola biləcəyini anladığı üçünmü belə bir etirafı dilə gətirib?

Bu sual ilə Milli Dirçəliş Hərəkatı Partiyasının sədri, Milli Məclisin deputatı Fərəc Quliyevə müraciət etdik.

Millət vəkili Xeberle.com-a açıqlamasında bildirib ki, Amerika Birləşmiş Ştatları artıq Yaxın Şərq siyasətini həyata keçirib və bu gün baş verənlərdə onun layihəsidir: "Siyasətdə auditoriya, mətbuat üçün deyilən fikirlər və bir də əməl olunan əməllər vardır. Hələ Ərəb baharı olanda Hilari Klinton bildirmişdi ki, burada ərəb baharı yaratdıq, ancaq sonunun nə olacağını bilmirik. Onlar bir xaos yaratmaq istəyirdilər, onu da yaratdılar. Hal-hazırda Ərəb dünyası tamamilə alt-üst olub. İŞİD yaratdılar və islam mədəniyyətini darmadağın etməyi bacardılar. Artıq İraq başda olmaqla güclü, zəngin dövlətləri çökdürüblər. Və indi lazımdır ki, onlar neftdən gələn gəlir ilə özlərini bərpa etsinlər. Yəni, əslində Amerika istəyinə nail olub. Sadəcə olaraq bu savaş Suriya və yaxud başqa ərəb dövlətlərinin savaşı deyil. Bu böyük güclərin savaşıdır, bölgə uğrunda savaş gedir. Verilən bəyanatlarda müttəfiqlərin sayını artırmaq, qarşı tərəfi zəiflədərək meydandan çıxarmağa xidmət edir”.

F. Quliyev qeyd edib ki, ABŞ-ın siyasəti instutlaşmış siyasətdir: "Yəni, orada əvvəlki dönəm hakimiyyətdə olanlar nə edibsə bunun mənə dəxli yoxdur prinsipi var. Burada Pentaqon formalaşmış siyasəti daha kəskin aparacaqdır. Bir zamanlar Obama da Əfqanıstandan hərbi qüvvələrini çıxaracağını demişdi, ancaq saylarını artırdılar. Mən hesab edirəm ki, bu savaş hələ davam edəcək və heç kəs o bölgədən məğlub durumda çıxmaqda maraqlı deyil. Onlar necə ki, Rusiyanı bataqlığa çəkdilər, onu tam çökdürənə qədər oradan buraxmaq niyyətləri yoxdur. Biraz da o mənada mesajlar göndərirlər. Son sözü isə Rusiya yox , ABŞ və Türkiyə deyəcək.

Hicranə İsmayılova

Xeberle.com

Siyasət bölməsi