Yalnız Rusiya, Türkiyə və İran vasitəçi kimi Dağlıq Qarabağ konfliktinin sülh yolu ilə həllinə nail ola bilərlər.
Bunu "Vestnik Kavkaza” saytına açıqlamasında rusiyalı politoloq Maksim Şevçenko söyləyib. Onun sözlərinə görə, Rusiya Qarabağda baş verənləri diqqətlə izləməyə borcludur:
"Hazırkı zamanda Rusiya həm Bakı, həm İrəvanın nəbzini əlində saxlamalı, müdaxilə edərək, davamlı müharibənin qarşısını almalı, hər iki tərəfə konstruktiv fəaliyyət üçün təzyiq etməlidir. Söhbət ilk növbədə erməni tərəfindən Azərbaycan torpaqlarının azad edilməsi və vətəndaşlarının buraya qayıtmasından gedir. Azərbaycanla Ermənistanın qonşuları onlara bu problemi həll etməkdə yardım edə bilərlər. Məncə, ssenari belə olmalıdır: İlkin mərhələ Dağlıq Qarabağdakı erməni əhalisinə zəmanət verilməli və azərbaycanlı əhali işğal olunmuş ərazilərə geri qaytarılmalıdır. Ola bilsin ki, Rusiya qoşunları burada sülhməramlı kimi çıxış etsin və ya ola bilər ki, burada Rusiya, Türkiyə, İran ordularından ibarət sülhməramlılar yaradılsın. Hələlik bu, daha az real görünür. İkinci mərhələdə Azərbaycan və Ermənistandan olan qaçqınların geri dönüşü üçün daha genişmiqyaslı proses başladılmalıdır. Xatırladıram ki, Ermənistan ərazisindən 500 min azərbaycanlı qovulub, Azərbaycandakı ermənilər də əziyyət çəkiblər. Bundan sonra Azərbaycan ərazilərinin suverenliyi tanınmalı və Qarabağın statusu ilə bağlı müzakirələr başladılmalıdır.
Hazırda Rusiya, Türkiyə və İrandan başqa heç kim Qarabağın həllində maraqlı deyil. Avropa Birliyinə dolayısı yolla maraqlıdır ki, Cənubi Qafqazda sülh olsun. Bununla Avropaya gedən enerji marşrutlarının təhlükəsizliyi təmin edilsin. Lakin AB öz sözünü deyə bilmir, çünki burada Amerika siyasəti əsas rol oynayır. Amerikalılar isə bu regionun daimi destabilizasiyasında maraqlıdırlar”.(Axar.az)

Xəbərdən istifadə edərkən istinad etmək vacibdir.