Noyabrın 30-da Azərbaycan, Türkiyə və Pakistanın xarici işlər nazirlərinin Bakıda toplantısı keçiriləcək. Maraqlıdır, 3 dost və qardaş ölkənin görüşündə əsas müzakirə mövsusu nədən ibarət olacaq? Və ümumiyyətlə bu görüş gələcəkdə qurula biləcək ittifaqın əsasını qoya bilərmi?
Xeberle.com-a açıqlama verən politoloq Nəzakət Məmmədova qeyd etdi ki, Azərbaycan, Türkiyə, Pakistan xarici işlər nazirlərinin bu toplantısı ilk dəfədir ki, keçirilir.
"Türkiyə XİN bəyanatından da görünür ki, görüşdə regional və beynəlxalq təhlükəsizlik məsələləri ilə yanaşı, üçtərəfli əlaqələrin hər sahədə inkişaf etdirilməsi məsələsi də gündəmdə olacaq. Eyni zamanda, tədbirin ertəsi gün Əfqanıstana həsr olunmuş "Asiyanın Qəlbi - İstanbul Prosesi" adlı nazirlərin iştirakı ilə konfransın da keçirilməsi planlaşdırılır. Tədbirin bizim üçün ən əhəmiyyətli hissəsi bundan ibarətdir ki, Əfqanıstanla yanaşı, Azərbaycan da tədbirə həmsədrlik edəcək. Bu, Azərbaycana göstərilən böyük etimaddır. Azərbaycan artıq tək Cənubi Qafqaz regionu ilə məhdudlaşmır. Avropa və Asiya arasında nəqliyyat-kommunikasiya, enerji layihələrində iştirak etməklə yanaşı, eyni zamanda Asiya qitəsində gedən proseslərdə rol oynayır. Bilirik ki, Əfqanıstan çox həssas bir bölgədə yerləşir, bu ölkənin çox keşməkeşli tarixi və bugünü var. Bu ölkə bir çox güc mərkəzlərinin maraq dairəsindədir. Azərbaycan indiyədək humanitar yüklərin bu ölkəyə çatdırılmasında tranzit ölkə idi. İndi isə artıq bu ölkənin təhlükəsizlik, inkişaf məsələlərində rol oynamağa başlayıb. Nəzərə alsaq ki, Əfqanıstan hər zaman önəmli bir geosiyasi mövqeyi baxımdan diqqət mərkəzində olub və bu gün onun əhəmiyyəti daha artmaqdadır. Ən azından Tramp Adminstrasiyasının hakimiyyətdə olduğu dövrdəki İranla münasibətlərin yenidən pisləşməsi fonunda Əfqanıstanın əhəmiyyəti artacaq".
N.Məmmədova əlavə olaraq bildirdi ki, Türkiyənin NATO ilə soyuqlaşan münasibətləri, İran və Rusiya ilə isə əksinə yaxınlaşması Əfqanıstan və Pakistanı Türkiyə üçün yenidən aktual tərəfdaş edir.
"Doğrudur, Türkiyə hələ 1950-ci illərdə Menderesin dövründə Bağdad Paktı ilə Pakistanla müttəfiq olmuşdular, lakin sonradan müəyyən səbəblərdən bu müttəfiqlik başa çatdı. Pakistan nüvə dövlətinə çevrildi, Türkiyə isə artıq çoxdan NATO üzvü idi. Bunlara baxmayaraq, bu iki ölkə arasında hər zaman yaxşı münasibətlər olub. Əfqanıstan və Azərbaycanın da bu təşəbbüsdə iştirakı yaxşı haldır. Çünki Türkiyə və Pakistan bizimlə çox yaxın, dost dövlətlərdir. Azərbaycanın müstəqilliyini ilk tanıyan dövlətlərdir, Azərbaycan torpaqlarını işğal edən Ermənistanla diplomatik əlaqələr qurmaqdan imtina ediblər. Lakin bu ölkələrin gələcəkdə müttəfiq olması bir qədər müşküldür. Çünki Pakistan ABŞ-ın Cənubi Asiyada əsas müttəfiqlərindən biridir, Türkiyə NATO üzvü olsa da, son dövrdəki siyasəti daha çox Rusiya, İran yaxınlaşmasını labüd edib. Azərbaycan balanslaşdırılmış siyasət yeridir, Əfqanıstan isə artıq NATO-nun məsuliyyət zonasına daxil olunub. Odur ki, əlaqələrin daha çox ikitərəfli və çoxtərəfli regional əməkdaşlıq çərçivəsində inkişafı daha çox inandırıcı görünür".
Hicranə İsmayılova
Xeberle.com
Siyasət bölməsi

Xəbərdən istifadə edərkən istinad etmək vacibdir.