Millət vəkili Qənirə Paşayeva Samsun valisi və Bafra icra nümayəndəsi ilə görüşüb.
Millət vəkili görüşdə Qarabağ problemi, Xocalı soyqırımı və Azərbaycan-Türkiyə birliyinin güclənməsinin önəmi barədə danışıb.
Deputat həmçinin Azərbaycanın tarixi, mədəniyyəti, Ermənistanın torpaqlarımızın 20 faizini işğal altında saxlaması, qaçqın və məcburi köçkünlərin uzun illərdir öz doğma yurdlarına dönə bilməməsi, Dağlıq Qarabağ və işğal edilmiş digər Azərbaycan ərazilərində dinc azərbaycanlılara qarşı ermənilər tərəfindən törədilən soyqırımlar, tarixi abidələrimizin erməni vandalizminə məruz qalması barədə də geniş məlumat verib.
Q.Paşayeva son zamanlar bəzi Türkiyə vətəndaşlarının Azərbaycanın icazəsi olmadan Ermənistan tərəfindən işğal altında olan torpaqlarımıza səfərlər etməsini, separatçı rejimlə görüşməsini, Azərbaycan və Türkiyənin maraqları əleyhinə açıqlamalar verməsini kəskin qınayıb:
"Bu kimi addımlar iki qardaş ölkə arasındakı münasibətlərlə yanaşı, Azərbaycan və Türkiyənin beynəlxalq səviyyədə yürütdüyü haqlı mübarizəyə də öz mənfi təsir göstərir. Onlara qarşı ciddi tədbirlər görülməlidir. Qarabağ, Xocalı soyqırımı həqiqətlərinin daha geniş yayılmasında qardaş ölkənin QHT və KİV-ləri böyük fəallıq göstərməsini gözləyirik”.(Axar.az)
Xəbərdən istifadə edərkən istinad etmək vacibdir.
