Türkiyə mətbuatının yaydığı məlumata görə, prezident seçildikdən sonra dəyişkən və qeyri-müəyyən siyasət yürüdən Amerika Birləşmiş Ştatlarının (ABŞ) prezidenti Donald Tramp Qüdslə bağlı qərar verməklə Yəhudi lobbisinin dəstəyini qazanmaq niyyəti güdür. Yayılan məlumatda D.Tramp Ağ Ev-in idarəçilik sükanı arxasına keçdikdən sonra hələ də öz administrasiyasını qurmaqda çətinlik çəkir. D.Tramp bir çox tərəfdaşlarını özündən uzaqlaşdırıb, belə demək mümkünsə ABŞ prezidenti küncə sıxışdırılmış kimi görünür. Vəziyyətdən çıxmaq üçün D.Tramp Qüdsü İsrailin paytaxtı elan etməklə bağlı qərarını açqılamaqla, həm də yəhudi lobbisinin rəğbətini qazanmaq istəyir. Hətta, türk mətbuatı bir az da irəli gedərək belə bir fikir səsləndirib ki, ABŞ prezidenti "Böyük İsrail planı”na uyğun olaraq Qüdsdən sonra hədəf olaraq Türkiyəni seçəcək.
Məsələ ilə bağlı Xeberle.com-a açıqlamasında politoloq Qabil Hüseynli bildirib ki, "Donald Tramp seçki ilə bağlı vədlərində Yerusəlimi, yəni Qüds şəhərini İsrailin paytaxtı kimi tanıyacağına söz vermişdi. Hazırda, D.Trampın başı üzərində qara buludlar sıxlaşmaqdadır və o, Amerika mətbuatında, konqresində və senatında həlledici qüvvəyə malik olan yəhudi lobbisinin rəğbətini qazanmaq üçün bu addımı atdı. Onu da qeyd edim ki, Qüdsün İsrailin paytaxtı kimi tanınması barədə təəssüflər olsun ki, konqresin də təklifi var idi. Yəni, yəhudi lobbisinin bilavasitə təzyiqi altında konqres Qüdsün İsrailin paytaxtı kimi tanınması haqqında təklif vermişdi. D.Trampın da seçkiqabağı vədlərində bunu söyləməkdə məqsədi həm yəhudi lobbisinin rəğbətini qazanmaq, həm də yəhudi millətindən olan seçicilərin səsini əldə etmək idi. Bu addımı atmaqla impiçment təhlükəsi altında olan D.Tramp yəhudi lobbisinin simasında özünə tərəfdarlar axtarır. Böyük ehtimal bu tərəfdarlar kömək edəcəklər ki, D.Tramp öz işini sona qədər çatdırsın və Amerikanın səfirliyini Qüdsə köçürsün.
İsrailə gəldikdə isə o, bu ərazilərdən kənara genişlənə bilməz. Onlar Suriyanı da öz əraziləri siyahısına əlavə edirlər. İsrail Rusiyada, daha sonra isə Sina yarımadasında da öz ərazilərini genişləndirməyə çalışacaq. Amerikanın planı İsraili bölgədə super gücə çevirməkdən ibarətdir. Amma buna müsəlman dünyası, Türkiyə izn verməz və Türkiyədən torpaq qopartmaq o qədər asan deyil”.
Politoloq Zərdüşt Əlizadə isə "Böyük İsrail planı”na Türkiyənin daxil olduğunu düşünmədiyini bildirdi: " Mən düşünmürəm ki, Böyük İsrail planına Türkiyənin də ərazisi daxildir. Amma əminəm ki, D.Tramp bu qərarı ilə onun impiçmenti barəsində getdiyi söhbətlərin məcrasını dəyişdirərək Yaxın Şərqə yönəltmək istəyir. Bu, Amerikanın siyasət tarixində olan hadisədir. Bill Klinton da impiçment məsələsinə görə Yuqoslaviyada müharibəyə başlamışdı. Bununla da o, diqqəti özündən yayındırdı və hakimiyyətdə qala bildi. D.Tramp da eyni fənddən istifadə etmək istəyir. D.Trampı insan taleləri, qanunun aliliyi, terrorizmin güclənməsi və s. maraqlandırmır. O, sadəcə istəyir ki, bu fənd vasitəsilə Yaxın Şərqdə münaqişə yaratsın və bununla da ictimaiyyətin diqqətini öz üzərindən yayındırsın".
Elnarə Salamova
Xeberle.com
Siyasət bölməsi
Xəbərdən istifadə edərkən istinad etmək vacibdir.
