Moskvada MDB-yə üzv dövlətlərin liderlərinin qeyri-rəsmi görüşü keçiriləcək.Ermənistana məxsus pilotsuz uçuş aparatı (PUA) məhv edilib. ABŞ prezidenti Donald Trampın administrasiyası "Kreml məruzəsi” üzərində işləyir. Moskva KXDR-in nüvə statusunu əldə etmək cəhdlərini heç vaxt qəbul etməyəcəyini açıqlayıb.
Dekabrın 26-da Moskvada MDB-yə üzv dövlətlərin liderlərinin qeyri-rəsmi görüşü keçiriləcək. Kremlin mətbuat xidməti xəbər verir ki, görüşdə Azərbaycan Prezidenti İlham Əliyev də iştirak edəcək.
Məlumata görə, Belarus prezidenti Aleksandr Lukaşenko, Qazaxıstan prezidenti Nursultan Nazarbayev, Qırğızıstan prezidenti Sooronbay Jeenbekov, Moldova prezidenti İqor Dodon, Tacikistan prezidenti Emomali Rəhmon və Özbəkistan prezidenti Şavkat Mirziyoyev görüşə qatılacaqlar.
Görüşdə 2017-ci ildə MDB-də Rusiyanın sədrliyinin yekunları müzakirə ediləcək, həmçinin, müxtəlif sahələr üzrə əməkdaşlığın inkişaf etdirilməsi haqda fikir mübadiləsi aparılacaq.
Dekabrın 25-i günorta saatlarında cəbhənin Ağdam istiqamətində Silahlı Qüvvələrimizin mövqeləri üzərində kəşfiyyat uçuşları həyata keçirməyə cəhd göstərən Ermənistan silahlı qüvvələrinə məxsus PUA məhv edilib. Bu barədə Azərbaycan Müdafiə Nazirliyindən məlumat verilib.
Ermənistan ordusunun baş qərargah rəisi Movses Akopyanın ötən həftə dediyi sözlər işğalçı ölkədə qarışıqlıq yaradıb. Erməni siyasi şərhi Tevos Arşakyan yazır ki, rəsmi İrəvan "aprel müharibəsi”ndə məğlubiyyətinə bəraət qazandırmaq gedişi edir.
Rusiyanın ölkə xaricində hərbi baza yaratmaq arzusu yoxdur. Bu barədə Rusiyanın Xarici İşlər naziri Sergey Lavrov danışıb.
"Bir sıra ölkələrdən fərqli olaraq, biz hərbi ekspansiya tərəfdarı deyilik. Güc proyeksiyası adı altında xaricdə, o cümlədən Latın Amerikası ölkələrində hərbi bazalar yaratmaq bizim üçün əsas hədəf deyil”, - Lavrov deyib.
Lavrov həmçinin NATO-nun hərbi potensialını Rusiya sərhədləri yaxınlığında artırmasının narahatlıq doğurduğunu bildirib.
"Vaşinqtonda rusofob isteriyası artıq paranoidal (həddindən artıq narahatlıq və ya qorxuyla xarakterizə edilən, tez-tez məntiqsiz şiddət bildirən bir narahatlıqdır - red.) xarakter kəsb edib”. Bunu "RİA-Novosti” agentliyinə müsahibəsində Rusiyanın Xarici İşlər Nazirliyinin başçısı Sergey Lavrov bildirb.
Onun sözlərinə görə, rusofob isteriyası Rusiya və ABŞ-ın əhəmiyyətli istiqamətlər üzrə əməkdaşlığının inkişafına imkan vermir, həmçinin dünyada əlavə gərginliyi təhrik edir.
"İki dövlət arasındakı münasibətlərdə həm köhnə, həm də yeni yaranan bir çox problem mövcuddur. Daha dəqiq demək, bu problemlər süni yaradılıb. Onlardan birincisi, Vaşinqton siyasi isteblişmentin tutduğu və artıq paranoidal xarakter aldığı rusofob isteriyadır”, - Rusiya xarici siyasət idarəsinin başçısı deyib.
Rusiyanın strateji təyinatlı raket qüvvələrinin komandanı general Sergey Karakayev Rusiya Müdafiə Nazirliyinin kollegiya iclasında ölkə başçısı Vladimir Putinə məruzə edib. Bu barədə "Kommersant” yazıb.
"Cənab Vladimir Vladimiroviç, bizim bu gücdə olan bir raketimiz ABŞ-ın 3 ştatına bəs edər. Raketlərimizin aşağı dəqiqliyi zərbənin gücü ilə tamamilə kompensasiya olunur”, - general deyib.
ABŞ prezidenti Donald Trampın administrasiyası "pis oğlanlar”ın siyahısı adlandırılan "Kreml məruzəsi” üzərində işləyir. Sənədlə Rusiya vətəndaşlarının yer aldığı "qara siyahı” genişləndiriləcək. Siyahıya yüksək vəzifəli Rusiya məmurları və hakimiyyətə yaxın biznesmenlər daxil ediləcək. Sənədin 2018-ci il yanvarın sonuna kimi Konqresə təqdim edilməsi nəzərdə tutulur.
Atlantik Şurasının eksperti, Dövlət Departamentinin sanksiya siyasəti üzrə keçmiş koordinatoru Daniel Frid nəşrə deyib ki, məruzə üzərində Maliyyə Nazirliyi, Dövlət Departamenti və Mərkəzi Kəşfiyyat İdarəsi bir sıra başqa idarələr işləyir.
ABŞ-ın Rusiyaya qarşı yeni mümkün sanksiyaları Moskvanın narahatlığına səbəb olur. Bu haqda Rusiya prezidentinin mətbuat katibi Dmitri Peskov Kremldə keçirdiyi brifinqdə deyib.
O həmçinin qeyd edib ki, Moskva bu məsələdə qarşılıqlılıq prinsipini rəhbər tutacaq.
"Rusiyanın ünvanına daxil edilən müxtəlif restriksiyalara, əlbəttə, uyğun cavab veriləcək”, - Kremlin nümayəndəsi vurğulayıb.
Xatırladaq ki, ABŞ Maliyyə Nazirliyi dekabrın 21-də Rusiyanın baş prokuroru Yuri Çaykanın oğlu Artyom Çaykaya qarşı "Qlobal Maqnitski qanunu” üzrə sanksiyalar tətbiq edib. Siyahıya həmçinin bütün dünya üzrə 13 nəfər və onlarla bağlı 39 fiziki şəxs, eləcə də şirkətlər daxil edilib.
Rusiyanın maliyyə naziri Anton Siluanov daha əvvəl deyib ki, Rusiyanı yeni maliyyə sanksiyaları hədələyir. Yeni sanksiyalar, ehtimal ki, dövlət istiqrazlarının buraxılışına toxunacaq.
ABŞ-da fəaliyyət göstərən "RAND Corporation” analitik mərkəzi Rusiya Silahlı Qüvvələrinin sahib olduğu imkanları göstərən bir hesabat hazırlayıb. Hesabata görə, dünyanın ən böyük ölkəsi Rusiyanı ələ keçirmək mümkün deyil.
Hesabatda qeyd edilir ki, Kreml Rusiyaya müdaxilənin qaçılmaz olduğu qənaətinə gələrsə, qabaqlayıcı zərbənin vurulması barədə qərar verə bilər.
Koreya Xalq Demokratik Respublikasının (KXDR) nüvə statusunu əldə etmək cəhdləri təhlükəlidir və Moskva bunu heç vaxt qəbul etməyəcək. Bunu "RİA-Novosti” agentliyinə müsahibəsində Rusiyanın Xarici İşlər Nazirliyinin başçısı Sergey Lavrov bildirib.
publika.az
Xəbərdən istifadə edərkən istinad etmək vacibdir.
