Məlumdur ki, Britaniyanın "Şark əl
Avsat” qəzeti belə bir məlumat yayıb ki, Amerika Birləşmiş Ştatları (ABŞ)
PKK-nın Suriyadakı qolu olan PYD-nin nəzarətindəki bölgələrə öz nümayəndə heyətini
göndərib. Nümayəndə heyəti orada İraqın Qəndil dağında PKK rəhbərliyi tərəfindən
müəyyən edilən şəxslərlə görüşüb və görüş zamanı əsas müzakirə mövzusu bölgənin
yenidən formalaşdırılması, "təhlükəsizlik qüvvələrinin” təlimi və ABŞ
bazalarının modernizasiyası məsələləri olub. Bununla da ABŞ-ın terrorizmə dəstək
verməsi məsələsi bir daha gündəmə gəlib.
Bəs bu hadisədən sonra ABŞ-ı
terrorizmə dəstək verən ən ciddi və effektiv qüvvə kimi qəbul etmək olarmı?
Politoloq Nəzakət Məmmədova Xeberle.com-a bildirib ki, ABŞ bu cür təşkilatlardan
istifadə etməklə öz maraqlarını qorumağa çalışır: "İndiyədək ABŞ-ın
terrorçulara dəstək verməsi barədə ittihamlar səsləndirilirdi. Həm də bunu
Türkiyə, Rusiya, İran kimi ölkələrin rəhbərləri deyirdilər. Çünki onların daha
geniş diplomatik, kəşfiyyat və digər kanallardan ən mühüm məlumatları almaq
imkanları var və demək ki, müəyyən faktlara söykənib bunu bildirirlər. Xüsusilə,
Türkiyə prezidenti Ərdoğan daim tutarlı faktlarla ABŞ-ın PYD/YPG-yə dəstək
verdiyini bəyan edib. ABŞ özü də PYD/YPG ilə əməkdaşlığını etiraf edib, lakin
onu terrorçu deyil, İŞİD-ə qarşı mübarizə aparan azadlıq mücahidləri kimi qələmə
verib. Lakin bu yaxınlarda məlum oldu ki, ABŞ həm də sağ qalmış İŞİD döyüşçülərinin
Suriyadan çıxarılmasında onlara kömək edib. Eyni zamanda, Suriyaya 4000 yük
maşını ilə silah göndəribmiş. ABŞ bu cür təşkilatlardan istifadə etməklə öz
maraqlarını qorumağa çalışır. Halbuki, Türkiyə kimi önəmli müttəfiqinin ən
vacib marağını - təhlükəsizlik və ərazi bütövlüyü maraqlarını da gözardı etməməlidir."
Politoloq qeyd edib ki, terror təşkilatlarından
istifadə etməklə öz maraqlarını həyata keçirmək böyük dövlətlərin əsas məqsədlərindən biridir:
"Görünən odur ki, terroru yaradan da, ona dəstək verən də böyük dövlətlərdir.
Terror təşkilatlarından istifadə artıq yeni müharibəyə taktikasına çevrilib.
ABŞ isə burada fövqəldövlət olaraq nəinki beynəlxalq sabitliyə və əmin əmanlığa
çalışmır, hətta öz maraqlarının qorunması naminə terror təşkilatlarından
istifadə edir, onların fəaliyyətinə göz yumur. PYD/YPG və PKK ilə münasibətlər
isə bunun ən parlaq nümunəsidir. Eyni zamanda, FETÖ təşkilatı vasitəsilə Türkiyədə
çevriliş etmək planı da ABŞ-ın terror təşkilatlarından həm də müttəfiq ölkələrin
daxili işlərinə qarışmaq üçün istifadə etdiyini göstərdi. Bunun nəticəsi
dünyada sabitliyin pozulması olacaqdır ki, ondan da hər kəs, o cümlədən ABŞ özü
yaxın gələcəkdə zərər görə bilər".
Elnarə Salamova
Xeberle.com
Siyasət bölməsi
Xəbərdən istifadə edərkən istinad etmək vacibdir.
