Dünən Azərbaycanda prezident seçkilərinin növbədənkənar 11 aprelə təyin olunması barədə sərəncam imzalandı. Bu sərəncamla bağlı ölkənin siyasi şərhçiləri özlərinə məxsus fikirlər səsləndirdilər. Biz də məsələyə aydınlıq gətirmək üçün mövzu ilə əlaqədar olaraq politoloq Nəzakət Məmmədovanın mövqeyini öyrənməyə çalışdıq.
Politoloq Nəzakət Məmmədova Xeberle.com-a verdiyi açıqlamada bildirdi ki, bunun əsas səbəbi elə prezidentin köməkçisi, professor Əli Həsənovun da qeyd etdiyi kimi bir sıra mühüm əlamətdar hadisələrin yubileyinin bu ilə təsadüf etməsidir.
"Bununla yanaşı, prosesin sürətlənməsinə təsir edən beynəlxalq şərtlər də ola bilər ki, bunun başında Türkiyə, Rusiya, İranda, hətta ABŞ-ın özündə vəziyyətin gərginləşməsi ehtimalıdır. Bu ölkələrdə olan sabitlik və ya əksinə, qarışıqlıq Azərbaycana da təsir edə bilər.
Bu il bir çox bizimlə yaxın münasibəti olan ölkələrdə seçki ilidir. O cümlədən, Rusiya və ABŞ-da. Türkiyədə isə 2019-cu il seçkilərinə hazırlıq olacaq".
N.Məmmədova əlavə olaraq qeyd edib ki, Azərbaycan növbədənkənar seçkilər keçirməklə sabitliyi qarantiya altına almış olacaq. Çünki qonşu ölkələrdə olan qeyri-sabitlik Azərbaycana da təsir edə bilər və bunun qarşısını almaq lazımdır.
Hicranə İsmayılova
Xeberle.com
Xəbərdən istifadə edərkən istinad etmək vacibdir.
