Politoloq Qabil Hüseynli Xeberle.com-a açıqlama verərək Amerikanın Suriyadakı hədəflərinə çata bilmədiyi üçün, məhz bu faktdan istifadə edə biləcəyini bildirdi:

 

"Keçmişə nəzər salsaq Amerikanın xüsusilə dinc əhaliyə qarşı qadağan edilmiş silahlardan istifadəyə görə dərhal hərəkətə keçdiyinin şahidi oluruq. Məsələn, İraqın Küveytə hücumu zamanı, İran-İraq müharibəsində belə  hallar yaşanmışdı. Amerika bu məsələləri nəzərə alaraq, İraqın hücumunda bunu da sitat kimi gətirmişdi. Amma Bəşər Əsəd həqiqətən də təkcə son günlər deyil, ümumiyyətlə son bir neçə ildə dinc vətəndaşlara və yaxud da terroristlərə etiraz edən əli silahlı vətəndaşlara qarşı təkcə xlor qazından deyil, həm dəm digər kimyəvi silahlardan istifadə etdiyi haqqında təsdiq olunmuş məlumatlar var. Məsələn, Amerikanın BMT-dəki nümayəndəsi bildirib ki, bu faktlar bir, iki ədəd deyil, yetəri qədər çoxdur. B.Əsədin həm adi, həm də kimyəvi silahlardan istifadəsi nəticəsində ən azı altı yüz min nəfərdən çox insanın qətl edildiyi bildirilir. Yəni bu adam sözün həqiqi mənasında cinayətkardır və  ölkənin başçısı vəzifəsində oturmaq həmin şəxsə heç cür uyğun gəlmir. O da mütləq Haaqa Beynəlxalq Cinayətlər Məhkəməsində Serbiyanın keçmiş rəhbəri kimi mühakimə edilməlidir. Amerika Serbiyanın Balkanlarda etdiyi hərəkətlərə qarşı çox prinsipial davrandı və sonuncu cinayətkara qədər hər kəsi tutub Haaqa tribunalına verdi. Amma Donald Tramp haqqında nə isə proqnozlaşdırmaq və yaxud da ehtimala yaxın fikir irəli sürmək çox çətindir. Onun səlahiyyətli nümayəndəsi bu fikirləri səsləndirir, amma fikir səsləndirmək azdır. Bu məsələ ilə əlaqədar Təhlükəsizlik Şurasının xüsusi iclasını çağırmaq lazımdır. Mətbuata məlumat verirlər ki, Amerika bunun üçün lazımi tədbirlər görəcək. Barak Obamanın dövründə də təhdidlər yağdırılmışdı, amma həyata keçirilmədi. Lakin məncə bu dəfə Amerika Suriyadakı hədəflərinə çata bilmədiyi üçün, məhz bu faktdan istifadə edə bilər”.