41 saylı Sumqayıt birinci, 42 saylı Sumqayıt ikinci, 43 saylı Sumqayıt üçüncü, 44 saylı Sumqayıt-Xızı dairə seçki komissiyalarında Mərkəzi Seçki Komissiyası tərəfindən keçirilən üçgünlük ixtisaslaşdırılmış kursların sonuncu günü seminar iştirakçılarının fəallığı şəraitində keçib.
Xeberle.com AZƏRTAC-a istinadən xəbər verir ki, 43 saylı Sumqayıt üçüncü dairə seçki komissiyasının (DSK) üzvləri və dairənin əhatə etdiyi 34 məntəqə seçki komissiyalarının sədrləri üçün keçirilən seminarda DSK-nın sədri Həsən Məmmədov MSK-nın keçirdiyi ixtisaslaşdırılmış kursların əhəmiyyətindən danışıb. O, seçkinin hər bir ölkənin ictimai-siyasi həyatında mühüm hadisə olduğunu vurğulayaraq, aprelin 11-də Azərbaycanda keçiriləcək prezident seçkilərinə hazırlıq prosesinin bütün məntəqələrdə sürətlə aparıldığını bildirib. Qeyd edilib ki, DSK üzrə seçici siyahısında seçicilərin ümumu sayı 43383 nəfərdir. Onların 168 –i ilk dəfə seçici hüququndan istifadə edəcək.
Sonra iştirakçılar "Seçki subyektləri, seçki hüquqlarının pozulmasına görə məsuliyyət nəzərdə tutan qanunvericilik aktları və məsuliyyət növləri” mövzusunda Sumqayıt Şəhər Prokurorunun böyük köməkçisi Pərviz Əliyevin çıxışını dinləyiblər. Seçkinin yüksək səviyyədə, demokratik və şəffaf keçirilməsi üçün möhkəm hüquqi bazanın mövcud olduğunu vurğulayan natiq sənədlərin rəsmiləşdirilməsi, seçki subyektləri, seçki hüquqlarının pozulmasına görə məsuliyyət nəzərdə tutan qanunvericilik sistemi, seçki siyahılarının dəqiqləşdirilməsi və digər məqamlar haqqında Qanunun müddəaları haqqında ətraflı məlumat verib.
Məruzə və çıxışlarda qarşıdakı prezident seçkilərinin yüksək səviyyədə, demokratik, şəffaf keçirilməsi üçün vacib olan məsələlər iştirakçıların diqqətinə çatdırılıb.
Sonda iştirakçıları maraqlandıran suallara aydınlıq gətirilib.
Xəbərdən istifadə edərkən istinad etmək vacibdir.
